Krîzê ekonomîkî yê Tirkîya seke xeylêk sektoran rê tesîrêko xirab kerdo heywankarîye zî berde verê qedîyayîşî. Tesîro xirab ê serê heywankarîye tewr zaf Wan, Colemêrg, Agirî, Îdir de dîyeno.

Vaya mazot, simêr û ceyranî her roje zêdîyena. Serra 2020î de vaya 50 kîlogramê simêrî hezar yan zî hezar û 200 bîye la nika vaya heman kîloyî tewr tay 2 hezar û 500 lîra ya. Wan û Colemêrg de goştê heywanan 25 yan zî 35 lîra yo.

Rahmî Çîftçîyo ke pê heywankarîye debara xo keno, îfade kerd ke eke zamî bi nê hawayî dewam bikerê ê do neçare bimanê ke heywananê xo biroşê.

Çîftçîyî vat: ''Ma bi zerarî heywananê xo weye kenê. Ma qasê 32 lîra kîloyêkê goştî roşenê marketan û kasaban. La ê hîna vaye danê merdiman.''

Mehmet Kayayo ke 40 serrî yo Wan de heywankarîye keno ard ziwan ke malîyetê weyekerdişê heywanan zaf zêde yo û vat: ''Ma hende xebitîyenê la nêeşkenê heqê keda xo bigêrê. Ez çend serrî yo heywankarîye kena la ez do neçare bimana ke heywankarîye ra fek vera bida.''