Artêşa tirke qezaya Licê ya Amedî de  perey operasyono leşkerî da destpêkerdene  û çarçewa operasyonî de daran birnena. Têgêrayîşê Ekolojî yê Mezopotamya vera nayî eşkerayîyêka nuştekîye daye û nê pare kerdî:

''Welatê ma de rîyê şewatê daristanan ra her roje daristanî çîn benê. Hetê bînî ra xora pê cigêrayîşê madenî, awbend, HES û JESan bi hezaran darî yenê birnayene û xoza yena talankerdene.

Cayanê ke dewleta tirke operasyon kena de  verî ya zî dima ra şewatî vejîyenê û darî yenê birnayene. No hînî eşkera yeno vînayene. Têna par netîceya operasyonê leşkerî yê Şirnexî de Cûdî de daristanî bi rojan vêşayî û ci rê mudaxale nêame kerdene.  Eynî warî de bi seyan darî ameyî birnayene û pê kamyonan ameyî kiriştene. Licê de zî eynî prosesî de hîrê rojî darîstanî vêşayî. Roja diyîne mudaxale ame kerdene o zî herinda hawayî ra erdî pê îtfaîye bi û nê semedî ra şewat hewna vejîya. Reyna şewatanê Mêrdîn û Sêrtî de zî kêmayîya mudaxalekerdişî ame dîyene.

Perey ra dewanê  qezaya Licê ya Amedî operasyono leşkerî yeno kerdene. Goreyê zanayîşê ke dewajan ra ameyî girewtene darî yenê birnayene û pê kamyonan yenê kiriştene. Nê rojanê ke krîzê îklîmî esto û heme dinya semedê kêmkerdişê tesîrê nê krîzî muneqeşe keno welatê ma de bi hezeran darî yenê birnayene û daristan yenê çînkerdene. No çîyêko tehlukeyin o. Ganî birnayîşê daran cade bêro vindarnayene.''