Wan û qezayê ci verê cû merkezê zîret û heywankarîye bîyî. Bi taybetî qezaya Erdîşî ya ke merkezê zîretî ya polîtîkayanê şaşan ra hînî citkarê ci nêeşkenê pê zîretî debara xo bikerê. Deşta Erdîşî rixmo ke erdê ci bibereket o, hînî tede berhemê kêmî yenê ramitene.

Citkarê Erdîşî hem polîtîkayanê zîretî yê şaşan ra hem zî krîzê ekonomîkî ra zerar kenê.

Mustafa Yilmazo ke Erdîş de citkarîye keno dîyar kerd ke emser berhemê înan kêm bîyê. Yilmazî ard ziwan ke ê pê vaya sotemenîye nêeşkenê berhemanê xo berê cayêkê bînî û biroşê. Yilmazî pare kerd ke rixmo ke mabênê Erdîş û Çalderanî de 60 kîlometre est a, ê neçare manenê ke seba nê rayîrî 2 hezar pereyê sotemenîye bidê. 

Yilmazî vat: ''Zêdîyayîşê vaya sotemenîye citkaran aciz keno. Seba ramitişê baxçeyê xo mi 3 hezar şitilî 9 hezar lîra ra girewtî. La mi tira kar nêkerd. Ez ewro zîretî ra fek vera bida û înşaet de bixebita zî do hîna zaf pereyan qezenç bikera. Ma 5 kesî nê baxçeyî de xebitîyenê la çîyêk nêkeweno destê ma.''

Yilmazî vat ke o citkarîye ra verî ramitoxê kamyone bîyo û vat: ''Mi kamyona xo rote û dest pê zîretî kerd. Ez berhemanê xo Ebex, Bêgir û Wan de roşena. Ma kenê ke berheman destê xo ra vejê. La eke ma bi qîmî nêroşê nêeşkenê çîyêkî qezenç bikerê. Citkarî çîyêkî qezenç nêkenê, bazirganî qezenç kenê.''