Bi serran o ke meslegê ke bi hêzê destan yenî viraştene, yew bi yew vînî benî. Bi averşîyayîşê teknolojîyî û vejîyayîşê makîneyan nê meslegî êdî vînîbîyayîşî ver de yî. Nê meslekan ra yew zî semekarîye yo. Bajarê Mêrdînî de tena 2 westayê ke nê karî kenî, mendî.

Fîkret Dogano 40 serreyî ke sûka Mêrdînê Kehenî de xebetîyeno, nê westayan ra yo. Dogan dîyar kerd ke o 7 serreyîya xo de dest bi nê karî kerdo û 30 serrî yo ke o nê karî keno û va ‘Ez meslegê pîyê xo domnena’.

‘Ma seba estore cîya, seba herî cîya virazenî’

Doganî va ‘meslego ke mîyanê şarî de sey semerkarîye yeno zanayene, raştîya xo de nameyê ci palankarîye yo’ û wina domna: “Hetê ma de semere yeno vatene, labelê nameyê ci yê rastikên palan o. Verê cu semeran de îskeleya textine ameyêne xebetnayene, palanan de texte çin a. Ma mîyanê ci bi keçe, kilîm û qamîşî reyde pirr kenî. Ma seba estore cîya, seba herî cîya virazenî. Ma 2 tenî nê karî kenî.”

Doganî da zanayene ke ê seba herî roje de 1, seba estore 2 hebî semerî virazenî û wina dewam kerd: “Ma êdî nêşênî çiraxan zî biresnî. Eke çirax bibo ma resnenî, labelê seba ke kar giran o, ti kes domanê xo nêerşaweno. No mesleg, meslegêko hêz wazeno yo. Ma nêşênî wextê verê û nika têvernî. Çimkî 30 serrî verê no dikan de 6-7 kesî xebetîyayênê. Çiraxî zî estbî, labelê nika ma tena mendî.”

‘Dewan ra yenî, herînenî’

Doganî dewamê qiseykerdişê xo de ard ziwan ke o meslegê pîyê xo domneno û wina va: “Ez 30 serrî yo bêmabên na sûke de xebetîyena. Ez hîna 7 serreyî bîya, ez nê karî pîyê xo ra musaya. Ez nika meslegê pîyê xo domnena. No kar sabir û hêz wazeno. Ma parçeyanê semere Bidlîs, Riha û Osmanîye ra anî. Verê cû Amed, Êlih û Sêrt ra kesî ameyêne Mêrdîn û semere hêrînayênê. Nika tena dewan ra yenî, herînenî. Semera heran 170, ya estoran zî 200 TL ya. Nika krîz esto û eke wina şêro ti kes nîno semere nêherîneno.”