Dewa Sorekî ya qezaya Mazgêrdî ya Dêrsimî de cinîyî hêdî hêdî seba zimistanî amadekarîya xo kenê. Fadîme Çetînkaya (58) zî baxçeyê merdim û cîrananê xo ra sebze û meyweyan arê dana û seba zimistanî nînan hem kena wişk hem zî  rîçal û konserveyan virazena. 

Fadîme îfade kena ke seba zimistanî ganî rewî ra amadekarîya xo bikera û vana: ''Mi rîçalê dirik, hêjir û sûrgulan viraştî. Eke sebze û meyweyê mi çin bibê ez baxçeyanê cîranan ra gêna. Tîya de her kes yewbînan ra hewcedarîya xo peyda kenê. Ma cayêkî ra nêhêrinenê. Ma xo ramenê xo çinenê.''

Fadîme ana ziwan ke ê kefweş ê ke heqê keda xo gênê û wina dewam kena: ''Ma sey cinîyanê Dêrsimî nêwazenê xozaya ma biba talan. Wextêk dewlete waşt dewa ma de ocaxê kerrayan viraza la ma verê ci de vindert. Coka înan zî tira fek vera da. Eke ê xozaya ma texrîb bikerê ma nêeşkenê pironêkê nanî biwerê. Ma tîya de bîyî pîl û ciwîyayî. ''