Dewa Arêgî ya qezaya Gêxî ya Çewlîgî de ameyêne waştene ke projeyê madenî do bêro viraştene. Projeyê madenî dima ke Şaredarîya Çewlîgî ya AKPyî bira 'Raporê ÇEDî hewce nêkeno' dabî hetê mehkeme ra amebi betalkerdene.

Wekîlê HDPyî yê Çewlîgî Erdal Aydemîrî çend rojî verî Meclîs de derheqê babete de qisey kerdbi û dabi zanayene ke fîrmaya madenî bi xo raporê ÇEDî amade kerd û şarî rê 'îlan kerdo' ke proje do newe ra bêro kerdene.

Komeleyê dewanê herême ameyî têhet û bi eşkerayîyêke vera projeyê madenî nêrazîbîyayîşê xo mojna. Eşkerayîya  wina ya:

''Ma 2018 de vera projeyê madenî yê Şîrketê Madanî yê Metalî yê Çewlîgî Mehkemeya Îdare ya Herême ya Erziromî de dewa akerdbî û netîceya raporê pisporan de proje amebi vindarnayene. La eşkera yo Şîrketê Madanî yê Metalî yê Çewlîgî  rantî ra fek vera nêdayo û seba raporê ÇEDî xîret kerdo. Dima Wezîrîya Vurîyayîşê Îklîmî, Xoza û Şaristanîye zî rant tercîh kerd û raporê ÇEDî da fîrma.

Mumkîn nîyo ke ma na rewşe qebul bikerê. Ma do bi her hawayî têkoşînê xo yê huqûqî û meşrûyî bikerê. Ma kombîyayîşê xo yê dewanê Arêg û Îlbeyî de îfade kerd ke do na rewşe qebul nêkerê. Ma do waranê xo yê cuye ra fek vera medê. Na herême de vîrameyîşê ma, gorê ma, xeyalê ma û xeylêk gandarî est ê. Ma nêwazenê nê pêroyî qurbanê rantî bibê. Ma rêxistinanê komelê sivîlî ra zî paştdayîş gênê. Kamyew huqûq, edalet û eql ney rê destûr dano? Ma venga Şîrketê Madanî yê Metalî yê Çewlîgî danê ke no yew wehşet o, tira fek vera bide. Ma heqdar ê û do ser bikewê.''