Santralê Hîdro Elektrîkî masêyanê Gola Wanî kişenê

Dima ke Gelîya Zîlane de karê HESî dest pêker, azor û fosfatî berz bîyî bi hezaran masêyî merdî. Vervatoxê Ekolojîya Zîlane Mîr Bahattîn Demîrî pare kerd ke selahîyetdarî sûc kenê û venga rayaumûmîye kerd.

Rixmê nêrazîbîyayîşan zî AKPyî pê vateyê 'Raporê ÇEDî hewne nêkeno' Gelîya Zîlane de Santralê Hîdro Ekektrîkî (HES) viraşt. Zerarê HESî eşkera benê. Masêyê Gola Wanî bi hawayêkê komkî mirenê. Dima ke roniştoxanê herême derheqê babete de muracatê CÎMERî kerd hukmatê AKPyî cendirmeyî şawitî herême.

Vervatoxê Ekolojîya Zîlane Mîr Bahattîn Demîrî rewşa Gelîya Zîlane ser o agahîyî dayî û pare kerd ke dima ke Gelîya Zîlane de HES virazîya xozaya herême de vurîyayîşê xirabî qewimîyayî.

Demîrî vat: ''20 dewanê Gelîya Zîlane ser o gef esto. Awbendê Koçkopruyî de masêyî mirenê. Hema hema pêro gemarê dewan herikîyenê Çemê Zîlane. Ma vatbi no ekosîstemê Gelîya Zîlane do çin bikero, masêyan bikişo coka ma muracatê selahîuyetdaran kerd. La tira netîceyêke nêvejîyaye.

Walîtî û selahîyetdarî pê projeyê HESî yê Zîlane sûc kenê. Walîtîya Wanî pê vateyê 'Raporê ÇEDî hewce nêkeno' rayîr da qirkerdişêkê neweyî yê Zîlane. Nika HESî ra masêyî bi hawayêkê komkî mirenê. Ma venga rayaumûmîya demokratîke danê ke bala xo bida na mesele ser.''