Her kuçeyê taxa Şêxmeqsûdî yê Halebî de derheqê xoverdayîşê vera îşxalê dewleta tirke û cerganê ci de hîkayeyêke esta. Kuçeyêkê na taxe zî sey ''Kuçeyê Gulan'' yeno zanayene. Kuçe nameyê xo keyeyê Delonîyan ra gêno. Keyeyê Delonîyî serra 1975î ra nata kuçe de gulan nanê ro. Kuçe de ke tede zaf şar û bawerîyî pîya ciwîyenê seraya gulan zî hînî sey ''Seraya Kurdîstanî'' yena namekerdene.

Endamê keyeyê Abdullah Delonîyî kuçe de 8 serayanê gulan de pîya xebitîyenê. Îşxalê dewleta tirke yê vera taxe de keyeyê Delonîyî zî neçare mendo ke koçê Hesekê û taxa Saxûrî ya Halebî  bikero. La keyeyî uca de zî gulî ronayî. Lajê Abdullahî Mahmut Delonîyî îfade kerd ke o zî domanîya xo ra nata gulan nano ro û pê nê karo ke babîyê xo ra musayo, debarê xo keno.

Mahmut Delonîyî ard ziwan ke îşxalê cergan de pêro roniştoxanê taxe zaf tengîye ante û wexto ke ê agêrayî taxa xo, newe ra dest pê ronayîşê gulan kerd. Mahmutî da zanayene ke ê bezreyê gulan Lazkîye Tartus û Hama ra anê û cinîya xo Cûmana reyde serê sibayî seba xebate şino sera.