Bi şîarê ‘Vîrê ma de yo, ma fam kenî, xo vîra nêkenî' Stuttgart de seba Qirkerdişê Dêrsimî vîrardişêk ame viraştene. Dêrsimîjî û dostî tewr bîyî.

Hozan Serdan, Şengul Pake û Sûat Baran tewrê virardişî bîyî û qetilkerdîşî ser o qisey kerdî.

Vîrardişo ke hetê Huseyîn Yamaç û Tûran Severî ya ame viraştene, Qirkerdişê Dêrsimî ser o wina ame vatene:

“Bi lawikan serrgêra 80. de Qirkerdişê Dêrsimî vîr ardene rehet nîyo. Peroyê dêrsimîjî hema nê dejî zaf xorîn hîs kenê. Seba çinkerdişê  şar û îtîqatêkî, wahşetêk, qirkerdişêk bi. No semed ra Qirkerdişê Dêrsimî ser o qiseykerdiş zî zehmet û dejin o."

Cayê vîrardişî de pankartê sey ‘Qirkerdişê Dêrsimî yê 1938î’ ‘Qirkerdişê Dêrsimî rê nê’ ameyî aliqnayene û bi renganê hewz, çeker û sûre de mûmî ameyî tafînayene.

Peynîya programî de seba tewrbîyayîşê vîrardişê ‘Qirkerdişê Dêrsimî’ ke 18ê teşrîna peyêne de do bêro viraştene, veng dîya herkesî.