Hukmato hêrişkar îtîqat û nasnemeyanê cîyayan nêwezano û hertim vera înan de dişmentîya xo ano ziwan. No semed ra vera elewîyan de hêrişî zêdîyenê.

Qezaya Sariyerî ya Stanbolî de verê berê Cemxaneyê Ayazaga yê Şûbeyê Sariyerî yê Weqfa Kulturê Anadolu y Haci Bektaşi Velî de mehlaya ke elewîyî tede manenî, bi hawayo korsan hoperloran ra bi vengêko berz ezan yeno wendene.

ELEWÎYAN SER O ZEXTÎ ZÊDÎYENÎ

Serekê Cemxaneyî Celal Ozerî vera neyî de reaksîyon nîşan da û wina va: "Ma elewîyî zî sunîyî zî naye ra bêhûzûr ê. Vanê ke 'Ma nêşkenê rabikewê û domanê ma şew hewn ra nişka ceniqyenê'. Qey çîyêko winasî kenî, ma fam nêkenî. Ganî selahîyetdarî na mesela çareser bikerî."

Ozerî qiseykerdişê xo wina domna: "Di aşmî cuwa ver no qewimîyayîş dest pêkerd û dora peyêne zî roja ke loqme ameyêne vila kerdene, hoperloran ra ezan ame wendene. No hêrişo psîkolojîk hetê kamî ra beno, kes nêzano. Tîya de, Ayazaga de ma elewîyan ser o zext esto."

WAZENÊ KE ŞARAN PÊVERDÎ

Pîranê Ocagê Ayazaga ra Îbrahîm Erdoganî zî hêrişanê dewleta tirkî yê verênan vist vîr û wina va: "Tarîx ra nata dewlete tim hêrişê ma kena. Bi waştişê birnayîşê vengê şaran, elewîyan qetil kenî. Tarîx ra heta ewro qet hukmatêk nêşkayo bi qetlîaman ma çin bikero. Ma senî ke heta ewro milê xo çot nêkerd, ewro ra tepîya zî ma sere berz wayîrê îtîqat û nasnameyê xo vejîyenî. Hukmatê Erdoganî bi nê hêrişan wazeno ke dizdê û qetlîamanê xo binimno."

Parlamenterê HDPyî yê Stenbolî Alî Kenanogluyî zî na mesela kirişt meclîsî û waşt ke wa Wezîrê Karê Zereyî Suleyman Soylû cewabê nêyî bido.