Baroyê Dêrsimî: Projeyê madenî do herême serûbin bikero

Baroyê Dêrsimî derheqê îlankerdişê wareyê madenî yê Koyê Munzurî de eşkerayêk daye û hîşyarîyê muhîmî kerdî.

Dêrsim de temamê Koyê Munzurî sey wareyê madenî ameyê îlankerdene. Baroyê Dêrsimî derheqê babete eşkerayîyêk daye û vat no do vernîya vînîbîyayîşanê girdan abikero û veng da şarî.

Eşkerayî de ame vatene ke demo ke Festîvala Kultur û Xoza ya Munzurî yena viraştene seba 43 hezar hektaranê  Koyê Munzurî rûhsatê madenî ame dayene û  şîrketanê neteweyîyî û mîyanneteweyîyî rê servîs ameyî kerdene. Eşkerayîye de ame vîrardene ke xeylî cayanê Dêrsimî de darî ameyî birnayene û bi qetilkerdişê xoza proses ameyo destpêkerdene û ame vatene ke Koyê Munzurê ke sey wareyê madenî ameyî îlankerdene de  temamî de 900 nebatê ke 227 ê înan teyna Tirkîya de estî û Parka Mîlî ya Munzurî do zirar bivînê.

Baroyî da zanayene  no qerar goreyê huqûqê bingeyênî û huqûqê Ewropa nêyo û vat: ‘’Bi nê qerarî heqê heme xoza, derûdor, ganîyan, awe, kerra û herre yenê binpaykerdene. Coka ma senî ke vera awbendan mucadele kerd ma do bi nê dinamîkan mucadele bikerê. Eke no proje bêro bicaaredene, doyanê derûdorê de do heme ganî naye ra zirar bivînê. Pulur, Hozat, Çemîşgezek û Pêrtag  de do cuya şarî bibo serûbin. Ganî vera naye heme Dêrsimijî û rêxistinê cimatî yê sivîlî mucadele bikerê.’’