Komeleya Cigêrayîşanê Ziwan û Kulturanê Mezopotamya (MED-DER) termînê 11. de kursanê xo yê kurdkî rê dewam kena. MED-DERî da zanayene ke tewr tay 350 şagirtê înan ê û ê kursê online zî danê. 

 Şagirtanê kursanê MED-DERî  Ajansê Mezopotamya rê qisey kerd û bale ante polîtîkayanê asîmîlasyonî ser.

Nuştox Burhan Babaogluyî dîyar kerd ke ey kitabêk bi tirkî nuşto la seba ke bi kurdkî binuso tewrê kursan beno. Babaogluyî vat: ''Eke ziwanê ma şoro estbîyayîşê ma zî do şoro. Polîtîkayanê asîmîlasyonî ra ziwanê ma nêbeno ziwanê cuye û bazarîye. Ganî ma bi ziwanê xo binusê û biwanê. Bi nê hawayî ma eşkenê heqê asîmîlasyonî ra bêrê.''

 Nejat Aslanî ard ziwan ke o qiseykerdişê kurdkî de zehmetîye anceno û vat: ''Ganî ma wayîrê ziwan û kulturê xo vejîyê, bi ziwanê xo  erdê xo de biciwîyê. Seba ke ziwanê ma çin nêbo ganî ma beşdarê kursanê MED-DERî bibê.''

Rohat Çapinî vat: ''Polîtîkayê asîmîlasyonî dewam kenê. Vera ney perwerdeyê bi ziwanê dayîke zaf girîng o. Seba ke bi ziwanê xo qisey bikera ez tewra nê kursî bîya. Ganî merdim kultur û ziwanê xo, xo vîr a nêkero.''  

Nûrettîn Ezgîyî vat: ''Ez pê hesîyaya ke ez kurdkî xo vîr a kena. Eke ma xo rê vajê kurdî la bi ziwanê xo qisey nêkerê nêbeno. Ganî her kes bi kurdkî bimuso.''

Elîfe Çobana ke Fakulteya Huqûqî ya Zanîngehê Dîcle de wanena vat: ''Kurdkîya mi hol nêbîye. Ez Amed de huqûqî wanena û eke ez şarî de eleqedar bena ganî ez kurdkî bimusa. Dadî û babîyê mi bi kurdkî la domanê înan bi tirkî qisey kenê. Ganî ma vera nê asîmîlasyonî têbigêrê.'' 

Fatîh Unalî vat: ''Kurdkî cuya rojane de bîya plano diyîn. Çunke her ca de tirkî yeno qiseykerdene. Seba ke ez na kêmasîya xo temam bikera ameya kursî Seba ke ziwanê ma vînî nêbo ganî her kes keyeyê xo de, bi domananê xo bi kurdkî qisey bikero.''