Edebîyatê kirmanckî yo modern çiqas erey bêro nuştene zî êdî reşto yew sewîyeya başe û hetê kalîte ra lehçeyanê bînan ra cêr nîyo. Beno ke hetê hûmare ra lehçeyanê kurdkî kurmanckî û sorankî de kirmanckî ra hîna zaf eserî ameyê nuştene labelê ma ke biewnê sewîye ra vînenîme ke mîyan de zaf ferqe çin a. No tena roman û hîkayeyan ney, seba şîîre zî wina yo.  

Edebîyatê kirmanckî de çi heyf ke cinî hîna tay ê. Zaf sebebê na rewşe est ê. Labelê roje bi roje edebîyatê kirmanckî/zazakî de zî cinî benê zêdê. Yanî edebîyatê kurdan o nuştekî seba cinîyanê kurdan hîna warêko newe yo. Tabî no tena seba ma kurdan wina nîyo, na rewşe seba heme komelanê dinya zî wina ya. Herçiqas ewro goreyê vizêrî her waran de vengê cinîyanê kurdan hîna baş bêro heşnayene zî, warê kultur û edebîyatî de hîna kêmasîyêda pîle est a. Yanî hîna cinîyê kurdan merkezê edebîyatî de nîyê. 

Edebîyatê kirmanckî/zazakî de şaîranê cinîyan ra yewe zî Berfîn Jêle ya. Berfîn Jêle Dêrsim de ameya dinya. Mektebo verên, wertên û lîse Mamîkîye de qedêne. Cunta 12 Êlule 1980î de di reyî gurete zere, ameye muhakemekerdene. Dima Îstanbul de şîye mektebê “Moda Tasarim” (Stilist, dîzayn). Serra 1991 de vejîye Evropa.

Zaf rojname û kovaran de şîîre û nuştê JÊLE vecîyayî. JÊLE, verê cû bi tirkî şîîre û nuştî nusnayê. 1991 ra nata giranîye daye zonê (ziwanê) xo, zonê xo zazakî/kirmanckî de şîîre û meqaleyî heta roza ewroyine nusena. 

Eserê aye ke hetanî nika weşanîyayê:

1- Berfîn Jêle, Çimê Eşqî To Der o, (şîîre), Vejîyayîşê Pêrî, Îstanbul 2013

2- Berfîn Jêle, Antolojiye Sairune Dîna, Belge yayinlari, Îstanbul 2014

 

***

ÇEND ŞÎÎRÊ BERFÎN JÊLE

ÇIME EŞQÎ TO DER O

 

Çimû ra dûrî, roze surgin

sewe bêhewn a

vay nêşîkîna

bicêrê binê bandira

qe pers meke…

hewsê xatirau de

pukelek a.

 

Zerrîya xo de, kou dan we

seyrê mirçiku vurî yo

çînêbîyayena to de 

sata qumî rişîna de

zaman qefelî yo.

 

Zor şîîrî nuşînê

namê xo çîn o

barut fînê ra ci

adir kenê we

axûzarîya zerrî

parzûnê haskerdene de

piroznenê ro.

 

Çiqa ke dûrî be…

çimê eşqî to der o.

HEYAT

Heyat her çî misneno însanî

desinde ci ra nêşkîno vaze; oxir bo

teyna, hata nika…

Ti xo vîr a kerdene ci ra nêmisu.

 

Çimê tu yê melulî, pêro qesû qiletnenê ro

Zon lewê de lal maneno!

  MESO

Ti ke şêre…

zerrîya mi de çîkê hesrete vay dînê 

çekuyê mi vileçewt manenê

meso.

 

Ti ke şêre…

zobîna îklimû de fetelîn

boya to ci ra nêna

meso.

 

Ti ke şêre…

ray mi rê rutûrupal ê

roji mi rê tip-tolî yê

meso.

 

Ti ke şêre…

hir û bereket oncîno we, sono

tomê welatî kî nêmaneno

meso.

 

Ti ke şêre…

haskerdene bêwayîr manena

dizdî mi ra tirenê

meso.

 

Ti ke meşêre…

jê puxurê sodirî 

to oncon zerrê xo

tîjî, asme, astarû

pêroyîne dan arê, kon lopa to

ti ke meso.

 

                        Usar – 2012