Memed Çapan Mazgêrd-Qilaçîye (Kalaycı) de 15 adare 1945 de ameyo dinya. Nufûsê dewlete de 15 temmuze 1947 nusîyayo. Memed Çapan, mektebo verên Mazgêrd de weneno. Dima mektebê “Fransız Filolojisi” qezanc keno û seba wendişî şono bi Îstanbul. 

Memed Çapan serra 1970 de "Koroyê Dostan"o ke Ruhî Suyî awan kerdo de ca gêno. O zî sey Sumeyla û Hasan Yukselîrî wendekarê Ruhî Suyî yo. Raywanî ya xo ya muzîkî de têsîrê Ruhî Suyî ey ser o zaf o. 

Wexto ke mamostatîya dibistane waneno xanima xo Emîne şinasneno û aye reyde zewjîyeno. Beno wayîrê di domanan. Labelê bodê semedê problemanê ekonomîk û pênêameyîşan benê cîya. Memed Çapan, hetê Karadenîzî de Bartin û Zoguldak, stanbul, badê zî Mazgêrd-Muxundu de mamostatîye keno.

1986 de şono Yununîstan. Nêzdîyê hîrê serrî tîya de karê înşaatî de xebitîya. Badê derbazê Almanya beno. Şarîdarîyê ke girêdayîyê Stuttgartîyê de karanê park û baxçeyan de xebitîyeno. Mehmed apan panc ziwanan zaneno: Kurdî, fransizkî, almankî, tirkî û yunankî. Memed Çapan seba ke muzîkî ra zaf hes keno Almanya de dest bi dibistana muzîkî keno. Memed Çapan bi serran o weşîya xo Almanya de dewam keno. 

Mîyanê şarê kurdî de kilamê ey "Duzgin Bava", "Daye Daye" û "Apo Silêman" tewr zaf yenê şinasnayene. 

Albumê Memed Çapanî yo peyên bi nameyê "Destana Derê Laçî" hetê Etno Muzîkî ra ame vetene. 

Çend kilamê Memed Çapanî yê ke ey bi xo nuştê:

 

MEZELA SEYÎDÊ MI

 

Ez o şûne dîyarê mezala Seyîdê xo

Çîçegî bîyê têra, vana cenet o

Mi kelê xo birna hîra vineto

Seyîdê mi naleno xorî ve xorî

 

Cêr Hardo Dewrês, cor asmêno kewe

Çimanê ma nêkuno hewnê sewe

Tomir bijêr bicinê dewe ve dewe

Belkîya eve lawikû sodir kerî

Pîrê mi pers kena, pîre de xas o

Ma rê sayîd o; Hardo Dewrês o

Hêfûnê xo cême roze deres o

Nalêna pîrê xo ser sondû burî

 

DUZGIN BAVA

 

Vera Qisleyî de mekan gureto

Namê Duzgin o, Duzgin Bava wo, Bava Duzgin o

Henî ke efkar keno çi ra vineto

Namê Duzgin o, Duzgin Bava wo, Bava Duzgin o

Xo çarnon Jêle cêron ververo

Jêla zelal a, ma rê heval a

Vana efkar meke, na wo rusneno

Namê Duzgin o, Duzgin Bava wo, Bava Duzgin o

 

DAYÊ DAYÊ

 

Dayê, dayê, dayê, dayê

Bêkesa bêwayê

Felek qemîs bîyo

Şîya hardo şîyay

Ez o çê rijîyaye

 

Dêrsim vera sono

Welat Mamekîya

Dayê qesey bike

Çi dîya çi nêdîya

Çi ra heredîya

 

Vana hîris û heşt o

Tepîya vêsanî ya

Lacê mi çi pers kena

A wa ke ma dîya kes nêdîya

Omrê mi qedîya

 

APO SILÊMAN

 

Apo Silêman

Ma be xêr dî

Ti xêr ama

Payna ro neway serrî

Henî ama

Apo Silêman, xalo Silêman, kalo Silêman

 

Ez pers nêkon ti ça ama

Senê heyat o, se vana

Derdû kena têra eve kemana

Apo Silêman, xalo Silêman, kalo Silêman

 

Ameyîme ginayîme ro Almanya

Ma ra dûrî mend welatê ma

Jê çîçegê kowû bîya meymanê ma

Apo Silêman, xalo Silêman,kalo Silêman

 

Ti ke şîya wertê qomê ma

Eke to ra pers kerd serva ma

Vaze Mem naleno eve zonê ma

Apo Silêman, xalo Silêman, kalo Silêman.