Şaîr û kemanebendê Dêrsimî yo namdar Silo Qij, serra 1912 de (Goreyê tayê cigêrayîşan no tarîx 1918 o) Dêrsim de, dewa Milanî  (Milû) de ameyo dinya. Nameyê eşîra ci Mîlan o. Şîîre û kilamê Silê Qijî mintiqaya Dêrsimî de zaf namdar û rûmetdar ê. Şaîr Silo Qij 14ê kanûna 2019î de dinyaya xo bedilnaye.

Goreyê ke yeno vatêne ey nameyê xo pîyê xo girewto.  Silo Qij hîna pancserrî bîyo pîyê xo ra kemane musayo. Ê pîya şîyî veyveyan û merasîmanê îqrarî. Badê ke pîyê ci mireno o teyna nê karê xo berdewam keno. Silo Qij demê Terteleyê Dêrsimî de zewicîyaye bîyo û wayîrê domanan bîyo. Di lajê xo rîyê nêweşîya gerrî ra mirenê, o yo bîn zî Erdlezê Gimgimî de semedê yew qeza ra mireno.

Rayîrwanîya ey a muzîkî de kemane rolêko zaf muhîm gêno. Ne teyna seba muzîkî, seba cuya ey zî rolêko muhîm kay keno. Wextê Terteleyê Dêrsimî, eskeran o berdo qerekol. Uca eskeran waşto ke Silê Qijî bikişe labelê Pulur ra yew çawişî destûr nêdayo. Çunke no çawiş şaîr û kemanebendê ilê Qijî  zaneno. Yanî kemane o destê merdişî ra raxelesnayo. Û badêk, o ca bi ca, alaye bi alaye fetilîyayo, eskeran rê kemane cinita û kilamî vatê.

Silo Qij wextêk Edene de maneno labelê seba ke welat ra hes keno û birîya welatî keno uca de dîyax nêkeno û agêreno welat. Lajê ci yo qij zî wexto ke Edene de mendêne rahmet keno Û Silo Qij bi zor û zehmet cenazeya lajê xo beno Dêrsim û uca de wedano. 

Zaf kilamê xo waxtê xortîya xo de nusnayê. Kilama Dere Laçî, Kilama Silo Sûr, Kilama Mîrê Çarekû, Sehayder, Kilama Daxbeg, Kilama Huso Mozîkî werte şarî de zaf yenê vatenê û nas benê.

Şaîr û kemanebendê Dêrsimî yo namdar Silo Qij 14ê kanûna 2019î de cuya xo bedilanaye. Mezela ci nika dewa Milanî de ya. Ey peyê xo de zaf kilam û şuwarayê qedrberzî verdayî.

Şuwara ke Şaîr Silê Qijî seba lajê xo Şah Haydarî (Sayderî) rê vata ra qismêk:

 

Dayê Erzurum o, kilê Erzurum o,

Sayderê mi cade de şono,

Têlê Sayderê mi amo seba Tuncelî wiy biko,

Kam o, kes mi ra beyan nêkeno,

Vano havalo! Ti ke heqî nas kena,

Ti ke sona, pîyê mi rê derdinî rê vaje,

Bakilê mi efkâr meke, Sayderê mi ê eskerî yo,

Lajê to mekteb û taşil ra vejîyo,

Nê cîgerê to xizmetê xo kerdo,

Teskeraya mi qumandanîya ordîya 3. kerda pirr,

Ax! lajê to meste haw yeno,

Sayderê to haw meste yeno,

Vernîya sima hazir o nêro,

Waxto ke tabuta vosnê min ê qerî arde, şîya baxçeyî de nêro,

El û qom amê, Sayderê mi ser berbenê,

Adir kuwto kemer û dare ser de, derdê cîgerê mi rê vêseno…