Hunermend Ahmet Kayayo ke 16ê teşrîna peyên a 2000î ke paytextê Fransa Paris de surgun de dinyaya xo bedilnaye, Goristanê Paris Pére Lachaise de serê gorê ci de ame yadkerdene.

Aktîvîteya yadkerdişî ke serkêşîya TEV-ÇAND, Têgêrayîşê Cinîyan ê Kurdan ê Fransa (TJK-F) û Konseyê Kurdanê Demokratîkan ê Fransa (CDK-F) de ameye organîzekerdene pîya bi cinîya Ahmet Kayayî Gultene Kaya xeylêk heskerdoxê hunermendî tewrê ci bîyî. Şaredarîya Parisî zî çelenk şawit.

Badê rêzgirewtişî Gultene Kaya qisey kerd. Kaya vat: ''Ez sey tim estbîyayîşê şima ra hêz gena. Paştdayîş û yewca de bîyayîşê şima semedê ameyoxî mi keno hêvîdar. Pê yewbînan ra hêzgirewtişî ma eşkenê nê rayîr de avêr şirê.''

Dima ra Vervatoxa TJK-Fyî  Bêrîvane Firat qisey kerd. Bêrîvane hêrişê vera gorê Kayayî vist vîrî û vat: ''Ahmet Kaya keye, hunermend û temsîlkarê her kesî/e yo. Senî ke ganîyanê ma rê hurmet nêkerd, merdeyanê ma rê zî hurmet nêkenê. Vizêr serrgêra dardekerdişê Seyîd Riza û hemrayanê ci bi. Senî ke Seyîd Rizayî vat 'Ez vera hîle û zûranê şima de pê şima nêeşkaya no mi rê bi derd, la mi zî verê şima de cok nêşana erd, wa no zî şima rê bibo derd' Ma zî sey înan eynî sozî danê.  Ma vera faşîzmî û dîktatorîye milê çewt nêkerd, ma do çirey milê xo çewt nêkerê.''

Kemal Karanfîlî ke bi nameyê ACTITî qisey kerd ard ziwan ke vera hêrişanê faşîzmî ganî şar, demokrat û şorişgêrî yewîya xo pîlêr bikerê. Aktîvîte bi deyîranê hunermendanê TEV-ÇANDî qedîyaye.