MA Mûzîk Amed de xebatanê xo domneno û emser serrgêra awanbîyayîşê xo yê diyînan de qezaya Rezan, Salona Veyveyî Şato de “Rojê Mûzîkî yê 2’yîne” organize kerdî. Roja verêne ya programî de bi seyan domanî beşdarê programî bîyî û Orkestraya Xozayîye ya Rîtîmî program de vejîye sahne ser. Namzedê Şaredarîya Rezanî yê HDP’yî Zubeyde Zumrute û Zeyat Ceylan û namzeda hemserekîya Şaredarîya Sûrî Fîlîz Buluttekîne zî beşdarê programî bîyî.

Konserî ra ver domanê ke orkestra de ca gênê, bi kincanê xo yê reng bi reng ê herêmîyî vejîyayî sahne ser û îdarekarê MA Mûzîkî Şêrko Kanîwarî qiseykerdişêk kerd. Kanîwarî bale ante sazîyê ke bi destê qeyûmî amey, girewtene ser û wina va: “Ê salonê hîrayî yê rindek û bê rûhî yê înan bê. Ma wina têrî, bi rûhê xoverdayîşî, kilamanê xo pîya vajê. Ma soz dabî. Ma ke bêrê girewtene, bimirê zî kilamanê xo terk nêkerê û pîya  vajê.”

Kilama ‘Kurdîstan çî xweş e’ ya ke Zarok TV’yî de ameyêne weşenayene ameyebî qedexekerdene û Zarok TV’yî rê 17 hezar tl cezaye ameyebî birnayene. Reyna qaso ke Kanîwar vano 4 beşê program o ke înan seba Zarok TV’yî viraşto ameyê qedexekerdene. Kanîwarî waşt ke her kes wayîrê ziwan û kulturê xo bivejîyo.

Herçiqas ke bêro qedexekerdene zî orkestraya domanan bi kilama ‘Kurdîstan çi xweş e’ dest bi konseri kerd û pêroyê domananê salone kilame pîya vate.

Orkestraya Xozayîye ya Rîtîmî ra dima Koroya Domanan a Zarok MA’yî ya ke îdareyê Devrîm Demîrî de ya vejîye sahne ser û seba ke menga Newroze ya kilama ‘Newroza Arî’ wende û programî bî kilama ‘Newroze Newroze’ dewam kerd.

Programê mûzîkî ewro zî eynî ca de saet 19:00 de bi beşdarîya Orkestraya Jinma do bêro domnayene.