Sehneyê Hunerî yê Mordemî festîvalêka soloyî serûber keno ke hunermendê Azaerbeycanî, Hollanda û Îranî tewrê ci bibê. Performansî bînaya Mordemî ya Kayapinarî de sey performansê soloyî do bêrê mojnayene. Şaristan de reya verêne Festîvala Soloyî do bêra kerdene.

Komîteya Amadekarîye ya Festîvale ra Azîz Işikî îfade kerd ke ê armanc kenê ke domanî û cinîyî tewrê cuya kulturî bibê û mîrasê kulturî yê ke hê benê vînî reyna bêrê ciwîyayene. Işikî bale ante zengînîya festîvake û veng da ke her kes tewrê festîvale bibo. 

Festîvale de kayê Tanik Gunerselî yê bi nameyê ''Anna Frank Saklanan Kız'' do bêro mojnayene ke îdarekarîya ci Sabahattîn Ozan Arslan keno û katkerdoxa ci zî Esma Kaygusuz a. Esma Kaygusuz do rolê Anna Frankî kay bikera ke sembola qirkerdişê yahûdîyan a. Kaygusuze vat: ''Ez kena ke vengê xo bida eşnawitene.''

Kaykerdoxê ke 3 welat û 9 şaristanan ra ameyî kayanê xo do mabênê 8-16ê sibate de pêşkêş bikerê. Festîvale de kayê Resul Bengînî yo îranij ''Çêlek'' û kayê Dunya Goftarî ya îranije ''S ya Dawiyê'' û kayê Omîd Xakpûrî yê bi nameyê  “Awaza Sed hezar Efiliya ya Evîndar”, kayê Parvîna azerbeycanije “Men Ölende Ağlama” do bêrê mojnayene.

Festîvale de bi teknîkê ''Mîmo dînamîk'' 3 pandomîmî do bêrê mojnayene û bi vatişê dengbêj Mihemedê Newalê yî destanê ''Memê Alanî'' do bêro vatene. Festîvale de kargehê hacetê tîyatroyî û kargehê veng û bedenî zî do bibê.