Amed Roşanê Ziwanê Kurdkî rê amade beno

Hemsereka MED-DERî Şîlane Elmas Kan û Hemserekê HDPyî yê Amedî Zeyyat Ceylanî venga her kesî da ke tewrê rayraşîyayîşê Roşanê Ziwanê Kurdkî yê 15ê Gulane bibo.

Aktîvîteyê Roşanê Ziwanê Dayîke yê 15ê Gulane Amed de dewam kenê. Aktîvîteyî 15ê gulane de bi rayraşîyayîşêk do biqedê. Hemsereka Komeleya Cigêrayîşanê Kultur û Ziwanî ya Mezopotamya (MED-DER) Şîlane Elmas Kan û Hemserekê HDPyî yê Amedî Zeyyat Ceylanî derheqê rayraşîyayîş û roşanî de qisey kerd.

Şîlane Elmas Kan bale ante tedaya vera kurdkî ser û vat: ''Kurdkî yena çinkerdene.'' Kane da zanayene ke ê do rixmê pêro tedayan zî do kurdkî bipawê û kurdkî nasname, kultur û tarîxê kurdan a. Kane vat: ''Eke ma wayîrê ziwanê xo mevejîyê tedaya dewleta tirke do bizêdîyê. 15ê gulane de, saete 16.00 de wa şarê ma tewrê rayraşîyayîşê 'Ziwanê kurdkî wa bibo ziwano fermî' bibo.'' 

Zeyyat Ceylanî zî îfade kerd ke seba ke kurdkî çin nêba ganî kurdî wayîrê ziwanê xo vejîyê û vat: ''Eke kurdkî nêba ziwanêko fermî û ziwanê perwerdeyî ma ganî wayîrê ziwanê xo vejîyê. Seba ke dewlete ziwanê ma bişinasa ganî ma têkoşînê xo pîlêr bikerê. Ma ziwanê xo bimusnê domananê xo. 15ê gulane de Parka Koşuyoluyî de ma do 'Rayraşîyayîşê Ziwanî' bikerê.  Ma venga pêro amedijan danê ke tewrê nê rayraşîyayîşî bibê.''