Dima ke AKP-MHPyî dest na Şaredarîya Amedî ser xeylêk hunermendê Tîyatroyê Amedî karî ra ameyî vetene. Labelê kaykerdoxan sibata 2017î de bi ked û xîretê xo Tîyatroyê Şaristanî yê Amedî awan kerd. Prosesê pandemî ra dima Tîyatroyî seba wextêkî perdeyê xo girewtî. Menga hezîrane de ekîpa kaykerdoxan dest pê xebate kerd.

Tîyatroyê Şaristanî yê Amedî sey her serre plan keno ke menga teşrîna verêne de sezon abikero la kaykerdoxî semedê vîrusê Korona û meseleyanê madîyan ra  qerqilîyenê. Tîyatroyê Şaristanî yê Amedî ra Zeycan Ateşî derheqê rewşa tîyatroyî de qisey kerd.

Zeycan Ateşî vat: ''Wextê janî de rewşa tîyatroyî xeylêk zehmet a. Eke şima kayêk nêvirazê, nêmojnê û seyrkerî nêrê butçeyê şima nêvirazîyeno. Ma pereyê xo bîletan ra qezenç kenê.  Ma do menga teşrîna verêne de dest pê mojnayîşê kayan bikerê la ma nêzanenê ke çew do bêro yan nê. Ma seba weşîya xo zî qerqilîyenê xora. Ganî Tirkîya de tîyatroyanê taybetan ra paştî bêra dayene. Ma nika verê xo nêvînenê. Ez vana qey Sehneyê Moda (Îstanbul) ra berî çew kayêk nêmojnayo. Paştdayîşê madîyî ra berî zehmet o ke tîyatro dewam bikero.''