Rîyê  vîrusê Korona ra xeylêk sazgeh û dezgehî mecbûr mendî ke falîyetanê xo bidê vindarnayene. Atolyaya Kultur û Hunerî ya Aryenî ya Wanî zî prosesê pandemî de xebatê xo vindarnaybî. Atolyeya ke newe ra dest pê qursê resim, muzîk, tîyatroyî kerd de ziwanê perwerdeyî zî kurdkî yo.

Zozan Abîya ke atolye de mamosteya resimî ya, ard ziwan ke prosesê pandemî de 4 mengî xebate dayî vindarnayene û vat: ''No proses hetê ma  ra zaf zehmet derbaz bi. Nika ma reyna dest bi xebatan kerd. Perwerdeyê ma komkî nîyê, ma sey yew kesîye dewam kenê. Ma vera janî heme tedbîrê xo girewte. Ma hewl danê ke domanê mabêne emrê 2 û 5 serrî wa ziwanê dayîke bimuse. Ma perwerdeyê xo bi ziwanê kurdkî  danê. Wan sera 90 kurdî estê la  sazgehêko  perwerde bi kurdkî bido çîn o. Coka ma hewce dî ke perwerdeyê xo kurdkî biderê. Amancê ma oyo ke domanî ziwanê xo qisey bikerê. Her ca de tirkî yena qiseykerdene. Eke kurdî nêbo ziwanê perwerdeyî û warê fermî de nêra xebitnayene, qiseykerdişê dayîke û babîyî nêvejeno. Coka ganî sazgehê ke kultur û hunerê kurdan danê ciwîyayene zafêr bê. Ziwan û kulturê na cografya kurdkî yo. Ganî her doman/e bi ziwanê xo bibo pîl. Ma veng danê keyeyan ke wa pîya bi  domananê xo tewrê  atolyaya ma bibê.''