DEM Partî û DBP pîya ‘pêvînayîşanê azadîye û haştîye yê komelkîyan’ rê dewam kenê.Merkezê Kongre yê Kulturê Amedî de kombîyayîşê şarî ame kerdene.

Tîya de Hemserekê DEM Partî Tuncer Bakirhanî qisey kerd.

Bakirhanî bale ante pêvînayîşanê bi Rayber Apoyî ser û vat: ‘’Heyetê ma çend reyî şîyî Îmraliyî. Nika tayê nîqaşê serê prosesê çareserîye yenê kerdene. Pêvînayîşê bi Birêz Ocalanî zaf girîng ê. Îqtîdar hertim sey meseleyêka asayîş û îstîxbaratî nêzdîyê meseleya kurdan bi. La meseleya kurdan bi muzakere û demokrasîyî çareser bena.

Çareserîya meseleya kurda seba pêro krîzanê Tirkîya firsendê felate ya. Eke na mesele çareser biba kurdî ganî bi ziwanê xo perwerde bivînê. Nîqaşê serê çekverdayîşî zî est ê. Seke ma hertim vat çekî netîceyê meseleya kurdan ê, sebebê ci nîyê.  Hetê bînî ra meseleya kurdan bi qiseyan çareser nêbena. 

Birêz Ocalan seba çareserîye formulê demokrasîyî pêşkêş keno. Ocalan Apo amadekarîya cidîye keno û eke no proses ser bikewo pêro kurdî û şarê Tirkîya do ser bikewê. Ma do nêzdî de fikranê Ocalanî rayaumûmîye de pare bikerê.

La ganî Ocalano ke sermuzakeregîr o hucreyê yewkesî de nêtepişîyo. Ganî şertê winayênî bêrê amadekerdene ke Birêz Ocalan bi rehetî fikranê xo rayaumûmîye de pare bikero. 

Persê ‘gelo vengdayîşê Ocalanî de çi est o’ zaf persîyeno. Ma Îmrali de nîyê û ez zî muhtewa nêzanena. Birêz Ocalanî vengdayîşê xo yê 2013î de vatibi ke ‘Wa çekî vinderê, fikrî qisey bikerê.’ Ma hema zî girîngîye danê nê vengdayîşî ser.

Temînatê nê prosesî ma nîyê, şima yê. Şima ganî wayîrê nê prosesî vejîyê.’’