Akademîya Ma Muzîkî 2017 de Amed de bi şîarê 'Seba her kesî muzîk her ca de muzîk' ronîya. Binê serbanê Akademîya MA Muzîkî û Komeleya 'Hêverî Domanî' bi rayîrê onlineyî perwerdeyê ziwanê kurdkî û muzîkî danê. Pêro Kurdîstan, Tirkîya û Ewropa de domanî tewrê nê perwerdeyî benê.

Koordînatorê Akademîya Ma Muzîkî Şêrko Kanîwarî derheqê xebatanê xo de ANFyî rê qisey kerd.

Şêrkoyî îfade kerd ke ziwan estbîyayîş o û ganî merdimî ziwanê xo bipawê. Şêrkoyî vat: ''Vakurê Kurdîstanî de perwerde bi ziwanê kurdkî nêdîyeno la tîya de seba naye têkoşîn û xoverdayîşê bi serran esto. Dezgeh û rêxistinê kurdkî seba ziwanê xo xîret kenê. Sey MA Muzîk têkilîya ma bi kargehanê muzîkî yê Ewropa estê. Ma prosesê janî de pê 4 wendekaranê kurdan ê Hollande dest pê perwerdeyê onlineyî kerd û nika 10 ra zêdêr wendekarê ma estê. Ez pê rayîrê muzîkî ziwan musnena domanan. Ez hem kurdkî musnena hem zî deyîran musnena.''

Kanîwarî ard ziwan ke wa her kes ziwanê xo bimuso pabeyê qanûnan nêbo û vat: ''Her kes eşkeno keyeyê xo de ronişo û pê lînkêkî ziwanê xo bimuso. Nika 300 kes eşkenê tewrê perwerdeyê ma bibê. Kamê wazenê tewr bibê wa bêrê ziwanê xo bimusê.Ewropa ra Îngilîstan, Fransa, Almanya, Swêd û Swîsre ra û Tirkîya ra 50 wendekarê ma estê. Her hewte ma sewbîna çi musenê. Bêrê ma pîya pê muzîkî kêfweş bibê ziwanê xo bimusê.''