Berfîne Işik Oztoprak cinîyêka dêrsimij a. Keyeyê Berfîne sebebê sîyasîyan ra serra 2003î de wexto ke Berfîne 5 serre bîye koçê Amerîka kerd. Dadî û xalê Berfîna 23 serre konservatuarî ra mezun bîyî. Berfîne zî tesîrê înan de manena û dest pê cinitişê tembûrî kena. Berfîne bi kirdkî û kurmanckî deyîran vana û wazena ke ziwan û kulturê xo bida ciwîyayene.

Berfîne hema ke 8 serre bîye tewra festîvalanê unîversalan bîye û hema zî tewra xeylêk konser û organîzasyonan bena. 

Berfîne qala hîkayeya xo wina kena: ''Dadîya mi Aynure Dogan reyde vejîyayêne sehhe ser. Ez zî înan reyde tewra xebatanê sehne bîya. Deyîra 'keça kurda' musnaye mi. Dima mi dest pê vatdeyîranê kirdkî kerd. Seba ke ez ziwanê xo û kulturê xo ra cîya nêba wina kena. Ez vera asîmîlasyonî deyîran bi ziwanê xo vaja. Amerîka de şar zî zaf eleqa mojneno konseranê ma. Ez deyîranê xo de wala qirkerdiş, dej û serebûtan kena. Bi nê hawayî şar zî zêdêr kultur û tarîxê ma meraq keno û cigêrayîş keno. ''

Berfîne îfade kena ke wexto ke a 11 serre bîye Amerîka ra ameye Dêrsim û hema zî trajedîya koçkerdişî vîrê aye de ya. Berfîne vat: ''Wexto ke ma şîyî Dêrsim hêverî ez kişta Munzurî de nişta ro û mi deyîrî vatî. Ez ameyox de zî wazena ke deyîran binusa înan vaja. Seba naye ez dewe bi dewe gêrena û goş dana hîkayeyanê merdiman ser. Ez înan ra lawikan û kilaman musena. Ez wazena şora Amed cayê dengbêjan û înan reyde ronişa.''