Kaykerdoxa cinîye Berfîne Emekdar derheqê girîngî û tesîrê tîyatroyî de qisey kerd. Emektare ard ziwan ke tîyatro sey beşêko girîng ê hunerî yo ke wexto ke şima wazenê mesajêk bidê komelî, şima eşkenê pê tîyato bidê. Emektare ard ziwan e ke tîyatro zaf sînoran werte ra wedarneno û vat: "Wexto ke şima kesan reyde bazarîye ser o bêrê têhet tîyatro sînoranê bazarîye werte ra wedarneno."

Emektare bale ante ser ke tîyatro Kurdîstan de zaf newe yo û derheqê rewşa ci de zî wina vat: "Beno ke hetê formî ra, roşnîye ra tîyatro serê sehneyî de zaf newe yo la tarîxê ci zaf kahan o. Merdim eşkeno dengbêjîye sey tîyatro bihesibno. Vakurê Kurdîstanî de emrê tîyatroyî 25 serrî yo la eke şima çar parçeyanê Kurdîstanî bîyarê verê çimanê xo tarîxê tîyatroyî zaf kahan o. Reyna Sovyetan de kahan o. Beno ke se serrî verê cû Evdilrehîm Hekarî Memê Alan nuşt naye ra ma eşkenê tarîxê tîyatroyî sey se serrî bihesibnê la kulturê komelan de ma eşkenê vajê ke tarîxê tîyatroyî 2 hezar serrî yo."

Emektare îfade kerd ke senî ke pêro komelan de tîyatro estbi kulturê kurdan de zî tîyatro sey alternatîf estbi û vat: "Mîyanê kurdan de şayîyê sey gaxanî estbî. La tekst, form û sehne ma de newe yê. Goreyê mi tîyatro eşkeno pawitişê ziwanî de rolêkê girîngî bigêro. Hem zaf tesîrê domanan keno hem zî tesîrê pîlan keno. Heyfo ke welatê ma de ziwanê kurdkî zêde nêno qiseykerdene. Domanî wexto ke tîyatro seyr kenê pê hesîyenê ke ziwanê înan têna ziwanê dadî û babîyê înan nîyo ke pê qisey kenê. "

Emektare peynî de tîyatro de cayê cinîye ercna û vat: "Tîyatroyê kurdî de bêguman keda embazanê cinîyan zaf girîng a. La heyfo ke cinîyî zaf nêvejîyayî vernî. Ma ney sey rexnedayîş hesibnenê. Ez naye sey kêmasîyêke vînena. La hîşmendîya cinîyan pêro tekstanê ma de cagêna. Reyna warê çekuyanê pederşahîye de zî ma teqez destûr nêdanê ke nê çekuyî bêrê xebitnayene û seba ke reng û vengê cinîyan bivejîyê vernî ma ked û xebata xo aver benê."