Komeleya Cigêrayîşanê Huner, Ziwan û Kulturî yê Semsûrî de, 1 mengî yo ke perwerdeyê Kurdî dewam kenê. Şerîf Yilmaz, mamostayanê komaleye ra yew o û vano ziwanê Kurdî teda û qedexeyan ver xo ver dano, la no xoverdayîş tena bi serê xo bes nîyo û ganî her wareyê cuye de bêro awankerdene. Yilmaz vano, komeleya Semsûrî newe dest bi xebatanê xo kerdo û no derheq de vengîye rê cewabêko muhîm a.

GANÎ MA HER CA DE QISEY BIKÊ

Yilmazî wina qisey kerd: “Heme teda û qedexeyan vera, ziwanê Kurdî reyna zî payan ser o û xo ver dano. Ziwan seba yew şarî nîşanê estbîyayîşî yo. Ziwan beden û ruhê merdimî yo. Dewletê îşxalkerî wexto ke wazenê yew şarî qir bikerê, dest erzenê rê ziwanê ê şarî û kenê qedexe. Rojakewtena Mîyanêne de çiqas heqê Tirk, Ereb û şaranê bînan esto, hende zî heqê Kurdan esto. La xeylî heqê ke dîyayê şaranê bînan, nêdîyayê Kurdan. No nêveto, ser de zî ziwanê ci kerdo qedexe. No sebeb ra zî seba ke ziwan bêro pawitene ganî her kes bi, ziwanê Kurdî qisey bikero.“

ZIWAN NÊNO QEDEXEKERDENE

Yilmazî ard vîrî ke Tirkîya de sey Almankî, Îngilîzkî xeylî ziwanî dibistanan de bi hawayê fermîyî yenê dayene û wendekarî ke nê dersan medê, mezûn nêbenê. Yilmazî wina dewam kerd: “Ewro wa û biratîya Tirk û Kurdan ser yeno qiseykerdene. La ziwanê Kurdan hîna zî qedexe yo. No çîyêko xelet o û nêno qebûlkerdene. Eke ma wa û bira yê, o wext çira ziwanê ma qedexe beno? Ê çiqas qedexe bikerê zî, ganî ma hîna zêde ziwanê xo rê wayîrtîye bikê.

YEW ŞAR BI ZIWANÊ XO ŞAR O

Ê her şarî yew ziwanê xo esto. Ê xozaye zî xeylî ziwanê xo estê û heywanî zî wayîrê ziwanî yê. Ma zî Kurd ê û şarêko cîya yê. Çira ziwanê ma yeno qedexekerdene? Dibistanan de Îngilîzkî, Almankî, Franskî perwerdeyî yenê dayene, la ê Kurdan çin o. No çîyêko pozîtîf nîyo, negatîf o. Her firsend de vanê ma misilman ê, kamcîn ayete de ameyo nuştene ke ganî yew ziwan bêro qedexekerdene!

QISEY BIKE, BIWANE, BINUSE Û BIFIKIRÎYE

Yilmazî, bi KHK padayîşê KURDÎ-DER’î ard vîrî û wina dewam kerd: “Padayîşê KURDÎ-DER’î ra dima, ma yew wext mabên da perwerdeyan. No bajar de ma newe dest bi xebatanê ziwanî kerd û ewro ma restê astêka muhîme. Ma kenê ke her wareyê cuye de wa Kurdî bi ziwanê xo qisey bikerê, biwanê, binusê û bifikirîyê. Ziwanê ma ser qedexeyî qet nêameyî wedaritene û ganî no derheq de ma hîna zêde mucadele bikê.“