Hewteyê Kulturê Kurdî yê Brukselî do mabênê 10 û 14’ê Temmuze de virazîyo. Hewteyê Kulturî do bi resepsîyonêk dest pê bikero û çar rojan dewam bikero. Resepsîyon do awanîya KNK’yî de bêro amadekerdene.

Roja destpêkî de do govendêka Kurdan bêro ramotene. Bi nê amacî do veyve esparê estorî bibo û meydanê ‘Brouckere’ ra heta meydanê ‘Espagne’yî şiro. Beşdarê rayraşîyayîşî zî do cilanê tradîsyonelan ê Kurdan xo ra dê. Hewteyê Kulturê Kurdî de do konserî, atolyeyî û xeylî aktîvîteyê cîyayî bibê. Meydanê Espagneyî de zî sey serranê ravêrteyan xeyme bêro ronayene, maketê awanîyanê tarîxîyan ê Kurdistanî bêrê ramotene, were Kurdan bêrê pêşkêşkerdene û standê kitaban do estbê. Heman wextî de grûbê govendan do hunerê xo pêşkêş bikerê û fîlmî bêrê ramotene. Dengbêjî zî sey her serre do vejîyê vernîya goşdaran. Grûba dansî ya Ermenîyan zî do wareyê hewteyê kulturî de hunerê xo pêşkêş bikero. Hewteyê Kulturê Kurdî bi serkêşîya Enstîtuya Kurdan a Brukselî, Kongreya Netewyîye ya Kurdistanî û Merkezê Cimatê Demokratîkî yê Kurdan Belçîka de yeno viraştene.