Kitabê 'Dêsê ke do Birijîyê' yo ke  hemsereka verên a HDPyî Fîgene Yuksekdag zîndan de nuşto Kadikoy de bi wendoxan ame têhet.

Aktîvîteya ke hetê Meclîsê Cinîyan ê HDPyî yê Îstanbulî ra ameye amadekerdene Hemsereka Pêroyî ya HDPyî Pervîne Buldan, Hemvervatoxa HDKyî Îdîle Ugurlu, parlamenterê HDPyî, endamê merkezê partîye  û xeylêk kesî tewrê ci bîyî.

Hemsereka HDPyî ya Îstanbulî Elîfe Bulut ke akîvîte de qisey kerd vat: ''Sey Yuksekdage xeylêk embazê ma mabênê çar dêsan de yê la seke şima zî vînenî fîkrê înan teber de yê.''

Dima ra kedkaranê BEKSAVî şîîrê ke Yuksekdage nuştî wendî û kurdkî tirkî deyîrî vatî.

Hemvervatoxa HDKyî Îdîle Ugurlu ke dima ra qisey kerd bale ante têkoşînê cinîyan ser û vat: ''Ma do rixmê heme hêrişan têkoşîn rê dewam bikerê.''

Pervîn Buldane bi wendişê şîîra  'Taybet Ana' ya Yuksekdage dest pê qiseykerdişê xo kerd. Buldane vat: ''Embazê ke zîndan de yê çirey ma ra nêqerfîyayî. Zerrî û pênusê înan tim cayê ma de yê.  Bi hîkaye, roman û şîîran mîyanê ma de yê.  Fîgena sînayîye bi na şîîra xo dejê Tirkîya girewtî dest. Şîîre ci qala raştîya Tirkîya kenê. Nê dejê ke şîîranê Yuksekdage de yenê ziwan verê rehîneyîya aye de qewimîyaybî la seke a kewta zîndan nê dejî dilab-hîrlab zêdîyayî.Yuksekdage, Demîrtaş, Gultene Kişanak û Îdrîs Baluken bi nuşteyanê xo tim cayê ma de bî. Embazanê ma yê ke nênuşt înan zî ge ma rê selam şawitî ge zî vernîyazî kerdî. Ge-ge zî bi rexneyanê xo ma kerdî hêzdar. Ma zanê ke ê zîndan de bê zî paştdayîşê înan ê têkoşînî gird û biqiymet o. Têna sernameyê Dêsê ke do Birijîyê qala çîyo ke ganî bêro kerdene, keno. Ya ganî ê dêsî bêrê rijnayene. Ê dêsî ganî birijîyê ke Yuksekdage, Demîrtaş û Tencelî bibê azad. Heta azadîya înan ganî têkoşînê ma bêro domnayene do bêro domnayene. Ez reyna vana wa zerrîya Yuksekdage weş bo. Rindo ke ti ma dir a.''

Badê qiseykerdişan Buldane kitabê kesanê ke tewrê aktîvîte bîyî îmza kerdî.