Şarê kurdî vizêr ra heta ewro zulm û qirkerdişê ke ameyê înan serre bi kilaman qal kerdê û nê tradîsyonî ewro zî domnenê. Cinîyan ard ziwan ke asîmîlasyono tewr giran hemverê kurdkî de yo, nika hemverê kurdan de “qirkerdişêko kulturkî” yeno bicaardene ûê hemverê nê de bi dengbêjîye xo ver danê.

Ma bi kilaman bîyî pîl

Mume Turane ke domanîya xo ra dengbêjî kena vat “Verî dewê ma estbî. La dimayo ke înan dewê ma kerdî veng asîmîlasyonê kulturkîyî dest pêkerd. Verî cinîyan kilamî vatêne, veyveyî wina ameyêne kerdene. Tu rojêk ma bê kilaman nêvîyartêne.

Ê nêresayî amacê xo. Ez hema zî bi dengbêjîye hemverê asîmîlasyonî de vindena. Her kilama ke ma vanê hemverê asîmîlasyonî de yew tirs a. Ma bi ganegirewtişê tradîsyonê dengbêjîye ercanê xo yê kulturkîyan pawenê.”

Kulturê kurdan bi dengbêjîye dest pêkerd

Werde Dayane zî vat ke dengbêjîye aye rê huzûr dana û wina vat: “Gama ke ma dewe de bî mayanê ma destê ma ra girewtêne ma berdêne veyveyan ke ma kilaman bimûsê. Înan bi vengkerdişê dewanê ma waşt ke nê tradîsyonî raşte ra wedarê. La bi hawayêkê qismî zî bibo ma no tradîsyon heta ewro ard.

Sayeyê kilaman de qirkerdiş û zulmî nêameyî vîrrakerdene. Ma 5 cinîyê dengbêjî hewte de reyêk yenê têhet kilaman vanê. Çayê cuye de beno wa bibo ganî ma kulturê xo mekerê xo vîr ra.”

Nerîman Keskîne zî muhîmîya dengbêjîye ser o vinderte û vat: “Mayanê ma ma ra waştêne ke ma dengbêjîye bidomnê. Dengbêj bîyayîş dejanê cimatî rê hempar bîyayîş o. Ganî ma çirey nê kulturê xo vîndî mekerê.”