Dêrsim de derheqê çîyê ke Terteleyê Dêrsimî de ameyî cuyayene de kitabêko bîn ame weşanayene. Bego Polato 90 serrî ke şahidîya Terteleyê Dêrsimî kerdo, çîyê ke cuyayî kênaya xo Rose Polat Agume ra vato û kênaya ci zî cuyayîşê ey bi nameyê ‘Bego; Dêrsim û dimayê ci’ de kerdo kitab.

Bego keyeyêk ke 8 kesan ra pê yeno de yeno dinya û rojêk cendirmeyî pîyê ci benî û pîyê ci reyna nîno. Dima ra 2 birayê ci beşdarê xoverdayoxan benî. Leşkerî yenî dewijan rasteyê dewe de anî pêser û benî Newala Harçîkî de kişenî û cenazeyanê înan erzenî mîyanê awe. Bego nêmireno û awe ra xelisîyeno, labelê ferq keno ke 2 engîştê ci qerfîyayî.

Bego Polatî babete ser o va ‘leşkeran ma heminan kom kerdî û ma ser o gule reşanayî’ û wina domna: “Dima ra heminan eştî mîyanê awe. Mîyanê kesê ke ameyî kiştene de cinîyê diganîyî zî estbî. Bitaybetî bebikan kiştêne. Ê yewbînan ra vatêne ‘wa ti kes ganî nêmano’. Seba ke cuyayîşê mi yê ê wextî bîyî kitab, ez zaf kêfweş a. No kitab tena qalê mi nêkeno, hîkayeya herkesî ya. Dejê ke mi antî, yê herkesî yî. Ez bawer kena ke reyna do çîyê winasî nêrî cuyayene.”

Kênaye Agume zî va ‘nuştişê kitabî ra ver, mi zaf cigêrayîşî kerdî’ û wina dewam kerd: “Ez û pîyê xo ma zaf reyan şîyî Newala Harçîkî. Her ke ma şîyî, pîyê mi eynî çîyî hîs kerdî. Seba ke pîyê mi ney cuya, ez zî dejaya. Ge-ge ma hetanî serê sibayî bermayî. Tewr zaf qetilbîyayîşê domanan mi ser o tesîr kerd. Bifikiryêne, domanêko 10 serrî çimanê keyeyê xo ver de yeno qetilkerdene.”