Dengbêjîye tarîxo fekkî ya ke nêameye nuştene. Dengbêjî her dewir de bîyî şahîdê tarîxê Kurdîstanî û ê nobetdarê kulturê qedîmî yê. Dengbêjîye çimeyêko xurt ê edebîyatê fekkî ya. Sayê dengbêjan zaf hîkayeyî bi deyîran û kilaman resayî roja ewroyêne û kulturê kurdan ganî mend. Debgbêj Abdulazîz Şîmşek zî nê dengbêjan ra yew o ke mîyanê komelî de sey Evdilezîzê Koçerî yeno şinasnayene. Koçer domanîya xo ra nata dengbêjîye keno û wexto ke doman bi tesîrê kilamanê dengbêjan de maneno û seba ke bibo dengbêj tim tewrê komelê dengbêjan beno.

'Bi Vengê Xo Yê Weşî Herême Germ Kerdêne'

Dengbêj Evdilezîzê Koçerî serra 1950î de dewa Helêlî ya Farqînê Amedî de yeno dinya û serra 1990î de keyeyê xo reyde koçê Êlihî keno. Koçerî sey nameyê xo tim waranê Kurdîstanî de koçerîye kerde û bi heywandarîye debarê xo kerd. Dengbêj Evdilezîzê Koçerî ard ziwan ke: "Wexto ke ma wareyan de bibî ma her tim kom bîyêne û ma kilamê dengbêjîye vatêne. Zimistan û hamnan de wareyê ma tim serd bîyî û şewî derg bîyî. Ma zî bi deyîran û kilaman şewê xo derbaz kerdêne. Wextêkê dergî de ma nêeşkayê şorê wareyan û bi hawayêkê azad kilamanê xo vajê. Ê rojî zaf kewenê mi vîrî.
50 serran ra nata ez bêmabên dengbêjîye kena. Dengbêjîye domanîya mi de hesret û waştişê mi bîye. Axir ez resaye hesretê xo. Dengbêjîye eşq a. Zaf serebûtê ke Kurdîstan de qewimîyayî merdim eşkeno nînan kilamanê dengbêjan ra bimuso. Eke dengbêjîye çinêbîyêne ma do qirkerdişê Zîlan û Agirî nêzaneyêne. Dengbêjî tarîxê Kurdîstanî resnenê komelî."

'Dengbêjîye Edebîyat û Tarîxê Kurdan a'

Koçerî vat kulturê kurdan bi sayê dengbêjîye ame pwitene û vat: "Kurdî bi dengbêjîye behsê tarîxê xo kenê. Bi dengbêjîye behsê şerî, hîkayeyî, eşq û destanan ê ke nêameyî nuştene xo renenê şarê kurdî. Dengbêjan tarîx û edebîyatê kurdan bi veng û hunerê xo pawitî. Ma dewamê dengbêjanê ke şîyî rehmî yê. Eke rojêke ma zî koç bikê kesê bînî do nê kulturê dengbêjîye dewam bikê.  Dengbêjan kulturê kurdan o ke nêame nuştene ard heta ewro. La heyf o ke nê dewirî de kesêk wayîrê dengbêjan nêvejîyeno. Ganî her kes wayîrê tarîxê xo bivejîyo û kulturê dengbêjan bipawo. Dengbêjîye tarîx a û ganî no tarîx bêro pawitene."