Fîlmê ''Ji Bo Azadiyê'' bi îdarekarîya Ersîn Çelîkî amebi antene û qala xoverdayîşê Sûrî yê 100 rojan keno ke serebûtanê raştikênan ra yeno meydan. Fîlm ganî roja 31ê kanûne de Sînemaya Salimî ya Silêmanî de biameyêne mojnayene la asayîşê Silêmanî bi bahaneya ''pawitişê menfaatanê aramîya şaristanî'' bire daye ke ê do destûr nêdê ke fîlm bêro mojnayene.

Vera naye nêrazîbîyayîşêko pîl ame mojnayene. Zaf hunermend, roşnvîr û hemwelatijan vera asayîşî tewirêko xurt mojna. Hemwelatîyan pare kerd ke astengkerdişê fîlmî pawitişê dişmenî û vera erjan û kulturê kurdan o.

Hunermend Herdê Semîrî derheqê babete de Rojnews reyde qisey kerd.
Herdê Semîrî vat: "Sînema, edebîyat û rojnamegerîya kurdan ser o sansurêko pîl esto. Astengkerdişê fîlmî seba kesanê ke warê sînema de gureyenê zaf giran o. Çunke fîlmêk bi kedayêka pîle yeno antene. Dewleta tirke nêwazena wêrankerîya ke a Vakurê Kurdîstanî de arde şarê kurdî ser bêra mojnayene. No zî nîşanê tersê dewleta tirke yê sînemaya kurdî yo. Dewletêka sey Tirkîya sînemaya kurdan ra bitersa no seba kurdan serkewtişêk o."

Herdê Semîrî venga sînemakeranê kurdan da ke cera nê tewirê asayîşî nêrazîbîyayîşê xo bimojnê û vat: "Beşêko pîl ê fîlmanê kurdan qala serebûtan û tarîxê kurdan keno. Hewce yo ke ma tarîxê xo bimojnê. Nika wext wextê hayîdarbîyayîşê tarîxê Kurdîstanî yo."