Koma Amara deyîrêka bi nameyê “Xakurka Cengê” derheqê xoverdayîşê Xakurkê de amade kerde.

Endamanê Koma Amara ra Xwezan Harûne vist vîrî ke dewleta Tirkî wazena polîtîkayanê xo yê îşxalkarîye Başûrê Kurdistanî de vila bikero û vat, “Hemverê na îşxalkarîye de hetêk ra gerîla bi hawayêkê tarîxîyî xover danê, hetêna ra zî şarê ma meydanan de beno vengê gerîlayan û hemverê îşxalkarîye de tewirê xo ramojneno. Ma zî waşt nê şerî û rastîya xoverdayîşî bi hunerê xo, bi deyîra xo ramojnê. Derheqê xoverdayîşê Xakurkê de ma deyîrêka newî viraşte. Ma umîd kenê ke şarê ma gama na deyîre goşdarî bikero do xoverdayîşê destankîyî hîna zaf hîs bikero.” Xwezan Harûne ard ziwan ke ê na deyîre û klîbî gerîlayanê HPG û YJA Starî rê kenê xelate.

‘Huner Hemverê Zulmî de Şero Tewr Pîl o’

Endama Koma Amara Delal Serhate vat înan waşto derheqê xoverdayîşê destankîyî yê gerîlayan ê Xakurkê deyîrêk virazê û vat, “Dewleta Tirkî ya îşxalkare wazena erdê Başûrê Kurdistanî îşxal bikero. Sere de PDK hêzê herêmkîyî paştî danê na îşxalkarîye. PDK erdê ma pêşkêşê îşxalkaranê dewleta Tirkî kena. Senî ke şarê ma vano erdê ma namûsê û şerefê ma yo ganî hemverê înanê ke erdê ma roşenê îşxalkaran vengê xo berz bikero û bikewo mîyanê têgêrayîşî. Bi taybetî şarê ma yê Başûrê Kurdistanî ganî hemverê ajanan de tewir ramojno û planê leyminî yê hemverê erdê ma bin fîno.”

Koma Amara ya muzîkî destpêkê serra 2000’î de koyanê Kurdistanî de bi şîyarê ‘rengê cinî û koyî’ awan bîye. Koma ke tena cinîyan ra yena pê bi vengê cinîyan xoverdayîşê koyanê Kurdistanî ana ziwan.