Dîrektoro rojawanij Şêro Hindê pê vatişê ''Eke şima wazenê kultur û tarîxê kurdan nas bikerê ganî bala xo bidê dengbêjîye ser'' şi Şingal.

Fîlmo dokumenter ''Evîn di rûyê qirkirinê de'' ke dîrektorîya ci Şêro Hindêyî û muzîkê ci zî Mehmûd Berazî kerdî û hetê Komunê Fîlman ê Rojawanî ra ame girewtene, vizêr fragmanê ci weşanîya. Fîlmo dokumenter o ke qala dengbêjîya kurdan ê êzidîyan keno 3 serran de ame girewtene. Fîlm nêzdî de Festîvala Dokumenteran û Fîlman a San Sebastianî de û festîvalanê bînan ê mîyanneteweyîyan de do bêro mojnayene.

Îdarekarê fîlmê dokumenterî Şêro Hindêyî derheqê fîlm û dengbêjîya êzidîyan de ANFyî reyde qisey kerd.

Şêro Hindêyî vat: ''Deyîr û dengbêjîya êzidîyan de ma zaf reyî rastê rêçê serebûtanê êzidîyan ameyî. Nê deyîran û dengbêjîya eşqî de zî rêçê fermanê vera êzidîyan esto. Hetê bînî ra deyîranê înan de qala qirkerdişan û hêrişan yena kerdene. Nê pêro seke dokumentê tarîxî yê. Dima ke Mehmûd Berazîyî vat dengbêjîya êzidîyan cîya ya ma dest pê cigêrayîşan kerd. Ma waşt ke nê kultur bidê şinasnayene. Dengbêjîya êzidîyan wayîra forman ê cîyayan a.

Seba ke ma hesasîyet mojna na dengbêjîye amadekarî, montaj û muzîkê fîlmî ser o zî ma zaf vindert.  Ma karêkê komunalî kenê. Xeylêk kesan waşt ke paştî bidê ma la ma qebul nêkerd. Teberî ra çew çin o karê ma de. Beno ke kêmasîya ma esta la ma do aye zî temam bikerê.''

Şêro Hindê kam o?

Şêro Hindê serra 1983î de Qamişlo de dadîya xo ra bi. Zanîngehê Şamî de beşê Arkeolojî de wend. Şam de wextêk perwerdeyê kamera girewt û Şorişê Rojawanî ra dima Komunê Fîlman ê Rojawanî de ca girewt. Hindê heman wextî de nuştox û kaykerdox o zî.