Dibistana muzîkî Zarok Ma  bi slogana ''Keyeyê şima yo dîyin'' 6ê temmuze de abena. Perwerdekarê Zarok Ma waşt ke keyeyî seba pawitişê kultur, ziwan û muzîkê kurdkî bêrê domananê xo qeyd bikerê.

Akademîya Ma Muzîkî  dima ke Konservatuarê Aram Tîgranî ame qefilnayene 2017 de pê şîarê 'Her kesî rê muzîk, her ca de muzîk' ronîyaye. Binê akademî de xeylêk orkestrayî estê. Nînan ra yew zî Zarok Ma ya. Perwerdekaranê Zarok Ma Şêrko Kanîwar û Evîne Dulek deerheqê xebatanê xo de qisey kerd.

Koordînatorê Ma Muzîkî û perwerdekarê Zarok Ma Şerko Kanîwar da zanayene ke Zarok Ma dibistana muzîkî ya ke domanî pê keyeyanê xo tewrê ci benê. Kanîwarî vat: ''Ma payîzî ra heta hamnanî 800 domanan gênê ke. Ma do 10ê temmuze de pê Orkestraya Ma konserêk bidê.''

Evîne Dulek zî ard ziwan ke ê xîret kenê ziwan û kulturê kurdan bidê şinasnayene dima zî perwerdeyê muzîkî bidê. Evîne vat: ''Domanî Zarok Ma de muzîk, ziwan û kulturê xo musenê. Roşanê Qurbanî ra dima perwerdeyê ma dest pêkeno. Ma venga dadî û babîyan danê ke muracat bikerê ma, domananê xo pê kultur û ziwanê xo pîl bikerê, bêrê qeydê xo virazê. Ma pabeyê şima yê.''