Şaîre Sultane Yaray a ke panelê ''Edebîyatê Kurdî de Rengê Cinîyan'' de qisey kerd vat trajedîya cinîyan ra yew zî na ya ke wexto ke cinîyî dest pê nuştişî kenê camêrdê bi vatişê 'To çita nuşti ti do çi binuse, ti do binuse?'' cinîyan qij vînenê.
Rojanê Edebîyatê Kurdî yê ke hetê Şaredarîya Êlihî, Komeleya Kultur û Hunerî (BART) ra yenê serûber kerdene Merkezê Kulturî yê Ahmet Guneştekînî de roja çarine de dewam kerd. Çarçewa bernameyî de panelê bi nameyê ''Edebîyatê Kurdkî de Rengê Cinîyan'' ame serûberkerdene.
Moderatorîya panelî hetê Dîlane Aydin ra ameye kerdene û Sultane Yaray, Roza Metîna, Xecê Şen û Herdem Merwanî panel de qisey kerd.Wekîlê HDPyî Feleknas Uca, Mehmet Ruştu Tîryakî û Hemşaredara Êlihî Songule Korkmaz zî beşdarê panelî bîyî.
Qiseykerdoxan ra Herdem Merwanî ard ziwan ke rîyê tedayan ra zaf nuştoxê kurdî zîndanan de tepişte yê û înan ra zafînan zî zîndanan de dest pê nuştişî kerd, coka înan zîndanî vurnayî kerdî sey dibistanan. Merwanî îfade kerd ke warê çapemenîye de ca nêno dayene nuştoxanê cinîyan û vat: "Wexto ke nuştoxê camêrdî kitabêk nusenî pêro çapemenîye dormeyê ci de gêrena. La seba nuştoxanê cinîyan eleqayêko winasên nêno dayene.
Şaîre Sultane Yaray zî pare kerd ke nuxtoxê cinîyî nênê paştdayene û înan ser o tedayêka nizamîye esta. Yaraye da zanayene ke cuya azade bi kerdişê gureyê keyeyî nêna awankerdene û vat: "Trajedîyanê nuştoxanê cinîyan ra yew zî na ya ke wexto ke ma dest pê nuştişî kenê camêrdî ma rê vanê ke 'To çi nuşt, ti do çi binuse yan zî ti do binuse?' û bi nê hawayî ma qij vînenê. La wexto ke camêrdêk binuso no vînayîş vurîyeno. Ganî hînî nê vînayîşî ra fek bêro veradayene."
