Dokumentero muzîkal ê b nameyê 'Efrînê Evînê' yo ke dîrektorîya ci rojnameger Zekerîya Efrînî kerde, festîvalan de do cabigêro. Muzîkal qala kultur, xoverdayîş, tarîx û îşxalê Efrînî keno. Xeylêk hunermend û muzîsyenê kurdî tewrê amadekarîya dokumanterî bîyî ke înan ra tay kesî nê yê: Brahîm Kêvo, Gare Sazkar, Yara Hebîb, Firîşte Efrîn, Jîn Xelîl, muzîsyen Ehmedê Çep, Mehmûd Horo, Hesen Gênco, Kawa Kalê.

Dokumenter de qalê waranê tarîxîyan ê sey Nebî Hûrî, Şêx Berekat, Keleha Samanê û Parsê Xatûn zî yenê kerdene.

Zekerîya Efrînî derheqê nê dokumanterî de wina qisey kerd: ''Ma bi nê muzîkalî waşt ke dişmenî rê vajê ti çend hêriş zî bikerî, îşxal zî bikerî do nêeşkî kulturê ma çin bikerî. Nê hêrişî seba ke kultur û tarîxê ma çin bikerê ameyî kerdene la kulturê ma çin nêbi. Ma sayê xoverdayîê kultur û erjanê Efrînî de qet do çin nêbê û têkoşînê seba Efrînî do qet nêqedo.''