Fuarê Kitaban ê Stenbolî seke her serre 10-18ê Teşrîna peyêne de destpêkerd. Rîyê krîzê dovîzî ra kaxidî bîyî vay û bi hawayêkê xozayî na raştî xo fuarî de zî ramot.

KOR Kitab ra Onur Ozturk meseleyî rê yewna het ra zî ewnêno û vano: “Seba ma dovîzî tenya kaxid nêkerd vay, çapkerdiş ra heta telîf malîyetê her çîyî kerd zêde. Seba man o nisbetê dovîzî hema zî problem o. Ma nika kaxid eşkenê peyda bikerê, la hetêna ra bicaardişê kotaye esto. Yanî seba ma problem dewam keno.”

TEWRBÎYAYÎŞ ZIHÎF O

Ozturkî da zanayene ke vêşîbîyayîşê malîyetî xo kitaban de zî ramojneno û vat: “Hewna roja hîrêyin a, la peynîya hewteyî ya ewilêne de rotiş qaso ke ma pawitêne çinbi. Ma pawe yê ke peynîya hewteyê vernîya ma de rotiş bibo vêşî, la tewrbîyayîş zihîf o.”

PEREYO KE SEBA KITABAN YENO WEDARTENE

Kesê ke fuar de yê zî berzbîyayîşê fîyatan ra lomeyan kenê. Malimêko teqawid ke nêwaşt nameyê xo bido vat: “Ewro kes nêeşkeno îhtîyacîyanê xo yê rojaneyan bi temamî tedarîk bikero, na yewe ra seba kitaban pereyî tay yenê wedartene.       

MERKEZÎ RA DÛRBÎYAYÎŞÊ FUARÎ

Gama ma xebatkaranê Weşanxaneyê Aramî dir qisey kerd înan ard ziwan ke Beylîkduzu de viraştişê nê fuarî seba kîtleya înan biproblem o. Problemê kemîbîyayîşê kaxidan ê zî anê ziwan la vanê ke çîyo ke seba ma fuarî ra zî muhîmêr o resnayîşê kitaban bi zîndanan o. 

TESÎRÊ SINIFA WERTEYÊNE

Standê Weşananê Dîpnotî de zî çîyê ke arîyenê ziwan sey nînan ê. Xebatkarêkê weşanxaneyî vano: “Raşt o, malîyetê kitaban bi vêşî. Hetêna ra herînayîş de kewtişêko zaf pîl çinyo. Krîzî hewna tam tesîrê sinifa werteyêne nêkerdo. Eke krîz tesîrê sinife werteyêne bikero esil ma do o wext zehmetîyan biancê.” 

TENGEYÊ BÎNÎ

Derheqê krîzî de Weşananê Arasî ra zî heman çîyî arîyenê ziwan. Wezîfedaro ke stand de yo vano: “Ancî zî bi hawayêk wendoxê ma xo resneno ma.” Gama ma wezîfedarî dir qisey kenê di ciwanê ke kitabê ‘Ermeni Soykırımı’ (Terteleyê Ermenîyan) gênê xo dest vanê: “Şima nê kitaban welatê ma de çira weşanenê? Tirkan Ermenîyî bêkiştî!” Naye ser o sohbetê ma birîyeno. Nê her di ciwanî anê vîrê merdimî ke sewbîna problemê weşanxaneyanê sey Aram û Arasî zî estê.