Tembûr enstrumananê muzîkî yê hemparan ê şaran ra yew o ke kulturê Kurdistanî de wayîrê muhîmîyêka pîle yo. Verê hezaran serran vejîyayo werte. Viraştişê nê enstrumanî ke emrê ci qasê tarîxê merdimîye kan o, meslekêka hunerkî û taybet a. Qezaya Yenîşehîrî ya Amedî de ma bîyî meymanê westa Ramazanî ke 20 serrî yo daran taşeno û keno tembûr.

Ramazanî vat ke seba viraştişê tembûrî lazimî bi hesasîyetêkê pîlî esta û vat ganî merdim enstrumano ke virazeno nas bikero, heman wextî de dara ke ci ra virazeno zî rind nas bikero. Ramazanî ard ziwan ke destpêk de çîyo tewr zehmet viraştişê perdeyan o û vat merdim mîyanê çend mengan de viraştişê tembûrî mûseno, ganî merdim bisebir bo.

Westayî vat o serra 1978 de Amed de ameyo dinya û 20 serrî yo kargehê xo de tembûran virazeno û vat, “Dimayo ke kodê tembûrî zî yeno amadekerdene, perçeyê tembûrî yê ke ameyê amadekerdene dûsnenê pêwa. Cayê ke mi înan ra vanê dime, fek û qefes bica kenê. Dimayê tenikkerdiş û bereqnayîşî têl û perdeyî tembûr de yenê bicakerdene. Dimayê bicakerdişê têlan akord yeno viraştene. Eke goreyê zerrîya şima bîyo a game ra tepîya yeno rotene.”

Westayî ard ziwan ke sey her çîyî viraştişê tembûran de zî karê fabrîkayan bîyê sebeb ke westayê tembûran bêkar bimanê û vat, “Labelê sazê ke fabrîkayan de yenê viraştene goreyê waştişê hunermendanê ke wazenê hunerêko bikalîte virazê nêyo. Hendeyê viraştişê tembûrî giştê ke cenenê zî muhîm ê. Gama ke sere rah eta peynî bi hawayêkê rastî bêro amadekerdene, a game ra tepîya dare bena veng, veng beno eşq, hesrete, umîd û xoverdayîş.”

Westayî vat ke very karê afernayoxanê tembûran rind bi, labelê nika wina bîyo ke nêeşkenê hendî kar bikerê. Westayî vat ke kemî westayê mendê ke tembûran virazê û mesleka înan verê çinbîyayîşî de ya.