Serê menga teşrîna peyêne de şaristanê Osloyî yê Norweçî de hunermenda kurde Gelawêje Welîdxanî derheqê têkoşînê azadîye de rolê cinîyan ê kurdan de bi vatîşê Rayberê Şarê Kurdî Abdullah Ocalanî pêramotişêk akerd. Kurdan û hemwelatîyanê Norweçî eleqeyêko pîl mojnabi pêramotişî.

Komeleyanê tirkan seba ke pêramotiş asteng bikerê muracat kerd la ê ser nêkewt. Wezaretê Karanê Zereyî pê eşkerayîyêke Norwêçî rê gef wend û waşt pêramotiş sansûr bikero.

Nameyê Komîteya Kultur û Perwerdeyî ya Şaredarîya Osloyî ser Ruand Îsmaîlî pare kerd ke ê xîretê sansurî qebul nêkenê.

Gelawêje Welîdxanî zî îfade kerd ke mumkîn nîyo ke merdim bê Rayberê Şarê Kurdî Abdullah Ocalanî qala Şorişê Rojawanî bikero. Gelawêje vat: ''Xebatê Ocalanî sey îdeolojîyêke wazenê jineolojî demokrasî reyde awan bikerê.''

Komeleya Hunermendanê Ditbarî, Komeleya Hunermendanê Ciwanan û Komeleya Ressaman zî pê eşkerayîyêka hempare ard ziwan ke ganî huner azad bo û no şertê demokrasî yo.