Festîvala Fîlman a SîneMardînî ya Mîyanneteweyîye ya 12. do mabênê tarîxanê 2-9ê Teşrîna peyêne de bêro viraştene. Festîvale de do 20 fîlmê bi metrajê dergî û 16 zî fîlmê kilmî bêdestmiz bêrê ramotene.
SîneMardînî yê 12. ke hetê Ofîsa Fîlmî ya Mardînî ra yeno organîzekerdene do bi fîlmê Nûrî Bîlge Ceylanî yê „Dara Şekoke“ bibo.
Mîyanê fîlmanê ke do festîvale de bêrê ramotene de fîlmê 2018î yê ke tewr zaf xelatî girewtê zî tede fîlmê ke emser zaf ameyê ecêbnayene zî estê.
Çend fîlmê ke do ramotişê înan bêro kerdene nê yê: Kelebekler (Perperikî) yê Tolga Karaçelîkî, Anons ê Fazil Coşkûnî, Hîrêgoşeyo Çargoşe yê Mehmet Gurelîyî û Findiqe ra Dima yê Ercan Kesalî.
Mîyanê weçîniteyanê mîyanneteweyîyan de zî fîlmê Capernaumî yê Nadîne Labakî, Hîrê Sey ê Jafar Panahîyî, Şero Serdin ê Pawel Pawlîkowskîyî, Karêkê Keyeyî yê Hîrokazu Koreedayî, Raywanîyêka Îstîsnayî ya Feqîrêkê Hîndîyî yê Kent Scottî estê.
Qismê domanan de zî do fîlmî anîmasyonî yê bi nameyê Didano Sipey yê Alexandre Espîgaresî ke berhemê Jack Londonî ra ameyo rociardene do bêro ramotene.
Heme programê ramotiş û atolyeyan ê SîneMardînî sey her serre do emser zî bêdestmiz bê.
