Festîvala emserî ya Kultur û Xoza ya Dêrsimî ya ke do hemverê hêrişanê serê kultur, ziwan, xoza û bawerîye de reaksîyon bidîyo û do nameyê ‘Dêrsim’î rê wayîr bêro vetene, siba dest pêkena.

Çarçeweya Festîvale de do derheqê ziwan, îtîqat, ekolojî û xeylî babetanê bînan de panelî bêrê viraştene û belgefîm û kayê tîyatroyî bêrê ramojnayene. Semedê domanan zî aktîvîteyê bireng bêrê viraştene. Hunermendê sey Mîkaîl Aslan, Kerem Sevînç, Mavîş Guneşere- Metîn - Kemal Kahraman, Erdogan Emîr, Babetna,Grup Vardîya, Yasemîn Goksu, Grup Munzur, Zelal Gokçe zî do bi deyîranê xo reng bidê festîvale.

Komîteya Amadekarîye ya Festîvale semedê tewrbîyayîşê festîvale vang da û derheqê festîvale de nê vatî: “Festîvala Kultur û Xoza ya Munzurî bi ravêrteyê xo tarîxkîyî yê vîst serrî reyna vil dana û zîl dana… Vîst serrî verî sazîyê ma yê ke seba kultur, bawerî û xozaya Dêrsimî wayîrê qesawetî bîyî prosesê festîvalan da destpêkerdene û no tradîsyon heta ewro ame. Vengkerdişê dewan, çinkerdişê cugehan, talankerdişê xoza, awbendî, fealîyetê madenkarîye, şewatê daristanan, seyd û çîyanê winayênan ser o rojdemî ameyê bewlîkerdene û festîvala ma bi serkewtişî resaya heta bi ewro.

Festîvala Kultur û Xoza ya Munzurî ya 19’ine emser zî bi heman rojdemanê giranan yena viraştene. Sazîyî na festîvale de do bi hişmendîya “Na dinya ma rê çewî ra mîras nêmende, ma a domananê xo ra girewte” tê bigêrê. Festîvala emserêne ya ke do Dêrsimijî û dostê Dêrsimî tewrê ci bibê, şexsê Nûpelda û Ayazê ke teqayîşê qezaya Pulurî de cuya xo vînî kerde îthafê heme domanan amîya kerdene.

Festîvala Kultur û Xoza ya Munzurî, cehdê wayîrvejîyayîşê tarîx, kultur, bawerî, ziwan û xozaya xo yo. Ma veng danê heme Dêrsimij û dostanê Dêrsimî ke tewrê Festîvala Kultur û Xoza ya Munzurî ya 19’ine ke do 25-28’ê Temmuze de bêro viraştene bibê. Dêrsimî rê, bawerî, ziwan û kulturê xo rê wayîr vejî, biciwîye û bide ciwînayene!''