Vizêr Komîteya Amadekarîye ya Festîvala Kultur û Xoza ya Munzurî da eşnawitene ke rîyê qedexeyanê Walîtîya Dêrsimî ra festîvale ameye betalkerdene. Dîya zanayene ke têna bernameyê Pilur, Pêrtag û Xozatî yê festîvale do bêrê kerdene.

Endamanê Komîteya Amadekarîye ya Festîvale  derheqê babete de Ajansê Mezopotamya rê qisey kerd.

Endamê Komîteya Amadekarîye Îbrahîm Kasunî ard ziwan ke walîtîye stadyum, wargehî qefilnayî, konserê Grup Yorum û Grup Îsyan Ateşî qedexe kerdî. Kasunî vat: ''Walîtîye rayraşîyayîşê ver bi Meydanê Seyîd Rizayî zî qedexe kerdbî la ma rayraşîyayîşê xo kerd û qedexe nêşinasna. Ma vera qedexeyan têkoşînê xo rê do dewam bikerê.'' 

Hemserekê HDPyî yê Dêrsimî Ferhat Yildizî zî îfade kerd ke tewirê qedexekerdişî yê Walîtîye têna vera festîvale nîyo û vat: ''Ewro Dêrsim pê kalekol, qereqol, qoricî, hêzanê asayîşî û noqtayanê cigêrayîşî binê tecrîdî de yo. Dêrsim binê ablûqa de yo. Ma çend reyî waşt ke wa Walîtîye na hişmendîya qedexekere ra fek vera bida. Ma vat ke pê qedexekerdişan ma nêeşkenê festîvale bikerê. Walîtîye zî seke wazena betal biba apey gamêke nêeşte. Yanî festîvale hetê Walîtîye ra ameye qedexekerdene.''

Serekê EMEPî yê Dêrsimî Ergîn Tekînî vat: ''Walîtîye tekperestîye kena. Ma do vera ney bi hêzanê kede û demokrasî têkoşîn bikerê.'' 

Serekê Komeleya Xoza ya Munzurî Ozkan Arslanî vat: ''Cografyaya Dêrsimî talanî de têrî yena. Ma sey komîte nêwaşt ke binê sînoranê Walîtîye de festîvale bikerê. Naye ra pey zî ma do binê sînoranê dewlete de festîvalanê xo nêkerê.'' 

Hemserekê Komeleya Elewîyan ê Demokratîkan (DAD) Musa Kuluyî vat: ''Hişmendîya AKP-MHPyî hişmendîya Abdulhamîdî ya. Qedexekerdişê festîvale, muzîk û xoza sûcê vera merdimîye yo. Ma ney qebul nêkenê. Ma do şarê xo reyde bi kultur, bawerî, ziwanê xo tim mîyanê têkoşînî de bibê. Qedexeyî kenê ke ma hîna zaf wayîrê ziwan, kultur û bawerîya xo vejîyê.''