Vizêr roja ci ya peyêne de Festîvala Kultur û Xoza ya Dêrsimî bi konserî qedîyaye. Hemşaredarê Dêrsimî, temsîlkar û endamê dezgeh û rêxistinan zî tede xeylêk kesî tewrê konserî bîyî. Konser de hunermendî Pinare Aydinlar, Ahu Dem, Grup Vardîya, Hasan Alî Sezer, Grup Munzur û Suavî vejîyayî sehne ser.

Konserî ra ver koma Varvare performansê govende kerd. Karkê Şaredarîya Qisle yê ke karî ra ameybî vetene bi pankarta ''Ma nan û karê xo apey wazenê. Eke nan çin bo haştîye zî çin a'' tewrê konserî bîyî.

Pinare Aydinlar konser de vera tepişîyayîşanê bi sebebê govendgirewtişî nêrazîbîyayîşê xo mojna û vat: ''Ma govendêka winayêne bigêrê ke ê bivînê.''

Dime Hetkarê Serekîya Partîya Kede (EMEP) Seyît Aslanî qisey kerd. Aslanî vist vîrî ke ciwanî semedê govende ra tepişîyayê û vat: ''Ê do nêeşkê govend û kilamanê ma bêveng bikerê. Ma do her şert de xoverdayîş û têkoşînê xo bikerê.''

Aslanî bale ante hêrişanê vera Başûrî ser û vat: ''Parlamentoyî ra seba operasyonanê teberê sînorî tezkereyî vejîyenê. Ma nê operasyonan şermezar kenê. Ma do pîya verê polîtîkayanê şerî bigêrê.''

Hetkarê Hemşaredaranê Dêrsimî Mustafa Taşkaleyî zî qiseykerdişo peyên kerd.

Dima hunermendê bînî vejîyayî sehne ser.