Komela Tîyatroyî ya Mersînî (METÎD) derheqê Festîvala Tîyatroyî ya Mîyanneteweyîye ya Mersînî ke emser reya ci ya 4ine do bêro viraştene de Cemîyetê Rojnamegeran ê  Mersînî (MGC) de kombîyayîşê çapemenîye viraşt.

Sereka METÎDî Derya Gunerîya  seba tewrbîyayîşê Festîvala Tîyatroyî ya Mîyanneteweyîye ya Mersînî ke mabênê tarîxanê 17-21ê Teşrîna peyêne de emser do reya ci ya 4ine bêro viraştene veng da vat: “Ma do kêfweşîya yewna festîvale ke cuya tede yena têhet biciwîyê.” 

Derya da zanayene ke înan festîvala ewilêne 2015 de viraşta û vat: “4 serrî verî, gama ma Festîvala Tîyatroyî ya Mîyanneteweyîye ya yewine viraşte, ma tengasîyê reya ewilêne yê organîzasyonêkê wina pîlî antî. La ma her serre hîna bîyî bitecrube û resayî hîna zaf temaşekaran.”

Derya vat roja ke înan komele awan kerde ra heta ewro waştê ke festîvalêka tîyatroyî ya mendeye û bikalîteye seba Mersînî virazê û wina dewam kerd: “Amacê ma yê viraştişê na festîvale no yo ke xebatê teatralî virazîyê, tîyatroyî biresê azanê neweyan û ma Mersînê xo de xebatanê bikalîteyan bikerê. Bi hişmendîya ke cimat do bi hunerî bibo haya hedefê ci de pêresnayîşê xeylî merdiman esto. Sey her serre emser zî do grûbê tîyatroyan bêrê têhet, ma do Mersîn de kêfweşîya yewna festîvale ke cuya tede yena têhet biciwîyê.”

Derya, veng da her kesî ke roja şemeyî ya 17ê Teşrîna peyêne de saet 19.00 de Yenîşehîr AKM de bêrê têhet.