Şorişê Rojawanî reyde festîvalan rê zî giranî ame dayene ke kulturê şaran nîşan danê. Festîvala Kultur û Hunerî ya Cinîyan zî, festîvala ke keda destan û hunerê cinîyan vejeno meydan. Bi rayberîya Desteya Kulturî ya Herêma Cizîrî û bi paştdayîşê komîteyanê kultur û hunerî virazêna. Emser nêzdîbîyayîşê 8ê adare de yena  viraştene. Festîvala ke 2 rojî do dewam bikero, 2 aşman ra zafêr seba ci hazirîye yena kerdene.

Festîvale do bi beşdarbîyayîşê cinîyanê 18 serre ra pîlêran bivirazîyo û do eserî tena kurdî, erebî û suryanî bibê. Seba erdlerzê 6ê sibate, programê festîvalî ame bedilnayîş. Coka govend, muzîk û çalakîyê sey nînan do nêbê. Programî de do eserê estaneke, hîkaye û şîîrî bêrê nîşandayene. Programî de tablo û hunerê destan zî est bibê.

‘Amancê ma o yo ke ma paştî bidê cinîyan’

Dîwanê Edebîyatî ya Vakur-Rojhelatê Sûrîye ra Botan Hoşe derheqê festîvalî de melumatî dayî û vat, ‘‘Ma ver bi festîvalê 8inî şinê. Goreyê parî emser ma hazirîya xo hîna hîra kerde. Muracatê seba festîvalî her serre ra başêr bîyê. Amancê ma yo esasî o yo ke ma paştî bidê cinîyan. Ma fikirîyayêne ke ma senî eşkenê hem hetê madî hem zî manewî ra paştî bidê cinîyan. Yewna amancê ma o yo ke, wa cinîyî hetê huner û edebîyatî ra raver şêrê. Seba erdlerz, YPJ û Şorişê Rojawanî tabloyî amyê viraştene. Ê zî do pêşkêşê şarê ma bibê û do di rojan ra dima xelate bêra dayene.’’