Fîlmê ''Ji bo Azadiyê'' (semedê azadîye)  fîlmêko newe û kurdkî yo ke xebatê fîlmî yê antişî qedîyayî û wextêkê nêzdîyî de sînemayanê Kurdîstanî de û dinya de do bêro mojnayene. Fîlm reya verêne 31ê kanûne de Sînemaya Salîmî ya şaristanê Silêmanî de do bêro mojnayene.

Fîlmê ''Ji bo Azadiyê'' qala xoverdayîşê 100 rojî yê Sûrê Amedî yê vera îşxalê dewleta tirke kena. Dewleta tirke ya îşxalkere serra 2015î de bi hawayêkê barbarî hêrişê qezaya Sûrê Amedî kerd, qezaya Sûrî ya ke wayîrê tarîxêkê kahanî ya raşaye û bi desan hemwelatîyî qetil kerdî.

Kaykerdoxê fîlmî Şîroyê Hendêyî derheqê prosesê antişê fîlmî de qisey kerd û vat: "Dîmenê fîlmî şaristanê Kobanê yê Rojawanê Kurdîstanî de amadekerdişê sehneyê Sûrî ra dima ameyî antene. Beşêkê kaykerdoxê fîlmî xoverdayîşê Rojawanî de şehîd bîyî."

Hendê derheqê fîlmî de nê çîyî vatî: "Hîkayeyê Sûrê Amedî zî sey pêro hîkayeyanê bînan ê kurdan, hîkayeyêko ganî yo û heta ewro dewam keno. Beşêkê kaykerdoxê fîlmî xoverdayîşê Sûrî de cagirewtbi. Beşêkê înan zî xelasbîyayîşê antişê fîlmî ra dima Vakur ra û Rojawanê Kurdîstanî ra tewrê xoverdayîşê  Rojawanî bîyî û şehîd bîyî.

Îdarekarê fîlmî Dîyar Hesoyî vat: "Wexto ke ma film antêne DAÎŞî hêrişê Reqa û dewleta tirke zî hêrişê Efrînî kerdêne. Rojhelatê Mîyanênî de zî vurnayîşê sîyasî ameyêne meydan. Cayo ke ma fîlm antêne nêzdîyê sînorê Tirkîya bi ke fîşekê ke dewleta tirke eştêne serê merdimî de perayêne. Rojawanê Kurdîstanî binê ambargoyêkê giranî de yo. Coka peydakerdişê hacetanê teknîkîyan meselêka girane bi. Ma zaf zehmetîyî antî la hem hetê xebatkarnê filmî ra waştiş û heskerdişêkê pîlî bibî hem zî şarê Kobanê zaf hetkarîya ma kerdêne."

Berpirsîyarê Produksîyonê fîlmî Sêvnas Ewdikîyî vat: "Kurdîstanî de zaf xoverdayîşê girîngî bîyî la qala zafînan nêameye kerdene. Armancê antişê nê fîlmî no yo ke xoverdayîşê Sûrî her tim wa ganî û mende bimano. Ma wazenê ke nê fîlmê xo pêro Kurdîstanî de û dinya de bidê mojnayene. Ma hêvî kenê ke fîlm zerrîya kurdan û her kesî de cayêkê taybetî bigêro. Her kes ey sey hîkayeyê xo bizano. Ma wazenê ke daşinasnayîşê fîlmî baş bêro kerdene û salonê sînemayan pir bibê."