Serkêşîya Odaya Sanayî û Bazirganîye ya Amedî (DTSO) û TUYAPî de Fuarê Kitaban ê 8. yê Amedî dest pêkerd. Fuaro ke 26ê ci bi kurdkî 216 weşanxaneyî tewrê ci bîyî do heta 8ê kanûne dewam bikero.

Fuaro ke Merkezê Kongre û Fuarî yê Mîyanneteweyî yê Mezopotamya de yeno kerdene Hemşaredarê Bajarê Pîlî yê Amedî Serra Bucak û Dogan Hatun zî tede xeyê kesî tewrê ci bîyî.

Mudirê Pêroyî yê TUYAPî Îlhan Ersozî vat: ''Ma xeylê fuaran kenê la cayê fuaranê kitaban semedê ma cîya yo. 216 weşanxaneyî fuar de ca genê. 400yî ra zafêr nuştox, hunermend, rexnegîrî  panel û terraqeyanê cîya cîyayan de do ca bigîrê. Reyna do 90 aktîvîteyî bêrê kerdene.''

Hemşaredare Serra Bucak zî nê vatî: ''Ma hewceyê atmosferê bêsansurî yê. Fuarî komelî semedê paştdayîşî anê têhet. Ma do serna warê fuarî dahîna xurtêr bikerê. Rîyê problemanê ekonomî ra weşanxaneyê mîyanê krîzî de yê. Bajaro ke 8 serrî yo binê îradeyê qeyûmî de yo kitabxane cayo ke ganî tede bo, uca nîyo. Kitabxaneyê Mehmet Uzunî yo ke Parka Sumerî de yo çiheyf ke halê nêşuxulnayîşî de yo. Fuar wa semedê bajarê ma xeyrin bo.''

Badê qiseykerdişan fuar ame akerdene.