Fuarê Kitaban o Mîyanneteweyî yê Stenbolî yo 37. mabênê tarîxanê 10-18ê Teşrîna peyêne de do bêro viraştene. Fuar de do seba kitabanê sîyasetkaranê kurdan Gultan Kişanake û Îdrîs Balukenî zî rojê îmzayî bêrê organîzekerdene.
Fuarê Kitaban o Mîyanneteweyî yê Stenbolî yo 37. mabênê tarîxanê 10-18ê Teşrîna peyêne de Merkezê Fuar û Kongre yê TUYAPî de do beranê xo heskerdoxanê kitaban rê akero. Fuaro ke do Weşanê Dîpnotî zî bi kitabanê xo tede ca bigîro. Fuar de do seba kitabanê sîyasetkaranê kurdan Gultane Kişanak û Îdrîs Balukenî zî rojê îmzayî bêrê organîzekerdene.
Weşanxane do heman wext de di kitabanê polîsîyeyan zî ke wextêkê nizdî de vetî zî fuar de do biresê heskerdoxanê kitabanê polîsîyeyan. Nê kitaban ra yew “Sokakta Siren Sesleri” (Kuçe de Vengê Sîrenî) yê Adrian McKintyî yo.
Mîyanê kitabanê ke do refan de cayê xo bigîrê kitabê “Queer: Resimli Bir Tarih” (Queer: Tarîxêko Biresim) ê akademîsyen Meg-John Barkerî û xêzkerdoxe Julia Scheele û kitabê “Feminizm Yazıları: Kuramdan Politikaya” (Nûşteyê Femînîzmî: Teorîye ra ver bi Polîtîka) yê Gulnûr Acar Savrane zî esto.
TERRAQE Û ÎMZAYA PAŞTÎDAYÎŞÎ
Roja yewşemeyî ya 17ê Teşrîna peyêne saet 14.00 de kitabê “Kürt Siyasetinin Mor Rengi” (Rengo Mor ê Sîyasetê Kurdan) yê hemsereka Şaredarîya Bajarê Girdî yê Amedî Gultan Kişanake ke zîndan de ya bi tewrbîyayîşê nûştox, rojnameger, hunermend û sîyasetkaran do îmzaya paştîdayîşî bêro organîzekerdene.
Weşanê Dîpnotî demêk verî zî romanê Îdrîs Balukenî yê bi nameyê “Üç Kırık Dal” (Hîrê Gilîyê Şikteyî) weşanabi. Seba kitabê Balukenî yê parlamenterê verî yê HDPyî ke hewna zîndan de yo roja dişemeyî ya 18ê Teşrîne saet 14.00 de bi tewrbîyayîşê Sirri Sureyya Onderî îmzaya paştîdayîşî bêro organîzekerdene.
