Xelatê “Festîvala Fîlman a Kobanê ya Mîyanneteweyîye” ke hetê Komunê Fîlmî yê Rojava ra amîbî organîzekerdene dîyayî wayîranê xo.

400 ra vêşêr fîlm, fîlmo kilm, anîmasyon, belgefîlm û belgefîlmê kilmî ê welatanê cîyayan ê dinya ra û çar perçeyanê Kurdistanî ra festîvale rê muracat kerd.    

Alberto Garcia ke Komunê Fîlmî yê Rojava de ca gêno û pîyê ci zî wextê şorişê Kuba de endamê heyetê Akademîya Sînema ya Kuba bi ANFyî rê qisey kerd. 

'ŞARISTANÊKÊ SEMBOLÎ DE VIRAZÎYAYÎŞÊ CI MANÎDAR BI'

Garciayî vat Kobanê de virazîyayîşê na festîvale manîdar o, no şaristan bibi destpêka vîndîkerdişê DAÎŞî û wina dewam kerd : “Ma kêfweş ê ke festîvala ma bi serfirazî vîyarte. Xeylî şaristananê Rojava de ma ramojîyayîşî kerdî. Heman wextî de ma Eyn Îsa, Şehba, Şengal, Mexmûr û xeylî kampanê multecîyan de zî ramojîyayîşî kerdî.” 

SÎNEMAYÊKA SENÊNE?

“Xeylî ciwan, kokim û cinîyî tewrê ramojîyayîşan bîyî. Bi pêroyî eleqedarî rinde bîye. Xora amacê ma zî no bi ke ma ramojnê sînema elîtîste nêya.”

Garciayî derheqê sînema alternatîfe de nê vatî: “Sînema çîyêka zereyê cuye ra ya. Babeta ci cuye ya. Ganî sînema merdiman rê îmkanê yewbînan naskerdişî û wextêkê rindî ravêrtişî bido. Cayanê cîya-cîyayan ê dinya ra xeylî fîlm û belgefîlmê ke babetê înan cîya bî tewrê festîvale bîyî. ”

ŞOPA PÎYÊ XO DE…

Rîyê ambargoyê hemverê Rojava û Vakurê Sûrîye ra xusûsen rîyê problemanê ke Başûrê Kurdistanî de yenê ciwîyayene ra xeylî jurî û dîrektorê ma nêeşkayî tewrê festîvale bibê. Garciayî ard ziwan ke festîvale seba ê zaf bifayde bîya û vat : “Ez seba bîyayîşê xo yê tîyayî zaf kêfweş a. Çunke pîyê mi zî wextê şorişê Kuba de Akademîya Sînema ya Kuba de bi. Ez zî ewro Rojava de seba hewilnayîşê kulturî yê mabênê Rojava, Îspanya û welatanê bînan mîyanê na xebate de ca gêna. Umîd kena ke serranê ameyoxan de do festîvale hîna zaf veng bido.”

'SE RA 60 RA VÊŞÊR Ê FÎLMAN FÎLMÊ CINÎYAN BÎ'

Safînaz Evdiko ke endamêka bîne ya komîteya hadreyîya Festîvala Fîlman a Kobanê ya Mîyanneteweyîye bîye vat fîlmê ke festîvale rê ameyî şirawitene înan ra se ra şeştî ra vêşêr fîlmê cinîyan bî û fîlmê ke dîrektorê înan cinîyî bî zî vêşî bî. Evdiko vat ke na festîvale înan rê bîya tecrubeyêko pîl.